La reciella tamién tien el so sitiu protagonista na XVI edición de la Primer Sidre L’Añu, un festival que, amás de ser referencia cultural del universu sidreru, apuesta de manera decidida pola tresmisión interxeneracional del padremuñu. Y ye que bona parte del programa ta pensáu pa que neños y neñes s’averen a la cultura de la sidre dende’l xuegu, la esperiencia y el deprendizaxe compartíu.
LA SIDRA.- Una de les actividaes más simbóliques ye la mayada infantil, una propuesta que permite a la reciella conocer de forma vivencial el procesu tradicional d’ellaboración de la sidre. Nun se trata namás de mirar, sinón de participar: mayar la mazana, entender los tiempos y sentir de primer mano una tradición que forma parte del ADN cultural d’Asturies .
Pero la ufierta infantil nun acaba equí. El festival incorpora un completu programa d’actividaes familiares que combina diversión y conteníu pedagóxicu. Hai xuegos infantiles, esportes tradicionales y propuestes como carreres de sacos o tiru cuerda, que coneuten coles formes de xuegu de siempres y contribúin a recuperar la cultura popular nun contestu festivu .
Tamién tienen un papel destacáu los talleres, onde la reciella pue averase al mundiu rural y sidreru dende distintes perspeutives. Dende talleres creativos y artesanales fasta actividaes como’l pebidal —rellacionáu cola llantación de pumares de magar la magaya—, los más pequeños participen activamente nun procesu que venceya naturaleza, cultura y sostenibilidá .
Esti enfoque pedagóxicu ye clave nel plantegamientu del festival. Nun se trata namás d’entretenimientu, sinón d’aniciar espacios onde les nueves xeneraciones conozan y valoren la cultura sidrera. La combinación d’actividaes llúdiques y educatives facilita qu’esta tradición viva siga tresmitiéndose, afayándose a los tiempos ensin perder la so sencia.
Asina, la Primer Sidre L’Añu consolídase non solo como un eventu pa los amantes de la sidre, sinón como una cita imprescindible pa families que quien compartir cultura, tradición y diversión. Porque si dalgo queda claro nesta edición ye que’l futuru de la sidre tamién se constrúi xugando.
