La DOP Sidre d’Asturies llanza la campaña “Influencers de Chigre” a la gueta de nuevos embaxadores de la cultura sidrera
La DOP Sidre d’Asturias presentó una nueva campaña promocional cola que pretende captar nuevos perfiles pa divulgar la cultura sidrera asturiana nes redes sociales. Baxo’l nome de “Influencers de Chigre”, la iniciativa plantega un casting abiertu pa escoyer diez persones que representen los valores de la sidre d’Asturies dende la cercanía y l’autenticidá.
La acción presentóse col llema “Nun buscamos siguidores, buscamos verdá. Persones como la sidre, auténtiques”, y pretende alloñase de los formatos publicitarios avezaos venceyaos al postureu dixital. La idega, según esplica la organización, ye crear una rede d’embaxadores con perfiles reales, venceyaos al territoriu y con capacidá pa comunicar d’una manera natural.
Convocatoria abierta fasta’l 3 de mayu
La campaña diríxese a persones mayores d’edá, residentes n’Asturies y con presencia activo nes redes sociales. Nun ye preciso tener miles de siguidores nin experiencia profesional previa como creador de conteníu.
La DOP señala que se valorará especialmente la vinculación con Asturies, el consumu davezu de sidre, la creación de conteníos sobro gastronomía, cultura, paisaxe o vida cotidiana, asina como contar con comunidaes participatives y alloñaes del consumu escesivu.
Pa participar habrá que siguir los perfiles oficiales de la DOP Sidre d’Asturies, cubrir el formulariu d’inscripción y unviar un vidiu de presentación desplicando la rellación personal cola sidre o col territoriu. El plazu de candidatures remata’l 3 de mayu a les 23:59 hores.
Diez escoyíos y un añu de duración
El procesu de seleición va combinar valoración interna y votación popular nes redes sociales. Ocho perfiles van ser escoyíos por un comité internu y los otros dos van decidise por votación abierta.
Los nomes de les diez persones escoyíes daránse a conocer el 11 mayu.
Les persones seleccionaes van formar parte d’un programa con duración aprodimada d’un añu. La DOP ufierta participación n’eventos edclusivos, formación en cultura sidrera, visites y esperiencies nel territoriu, recepción de productu amparáu pola denominación y presencia nos canales oficiales.
La sidre a la gueta de voz propia nes redes
Con esta campaña, la DOP Sidre d’Asturies apuesta por reforzar la so presencia nel ámbitu dixital con perfiles cercanos y reconocibles. L’oxetivu ye treslladar a les redes una manera d’atalantar la sidre basada nel chigre, la convivencia y la cultura propia, apostando por una comunicación más direuta y menos artificial.
