LA SIDRA.- La organización del SISGA’26 busca persones que quieran collaborar ente’l 24 y el 27 de setiembre. Nun fai falta experiencia previa nin poder participar los cuatro díes: hai turnos adaptaos a la disponibilidá de cada persona y perfiles bien distintos, dende atención al públicu y apoyu a productores internacionales hasta fotografía, vídeo, redes o lloxística.
Hai munches formes de participar nel Salón Internacional de les Sidres de Gala, pero una d’elles permite conocer el SISGA d’una manera especialmente cercana y vivir una esperiencia única: formar parte del equipu que lu fai posible.
La organización del SISGA’26, que se va celebrar del 24 al 27 de setiembre con actividaes en Xixón, Villaviciosa y Nava, acaba d’abrir la so campaña de voluntariáu. Busca 14 persones y va recibir solicitúes hasta’l 17 de setiembre. La mayor necesidá concéntrase’l sábadu 26, coincidiendo cola Tastia Abierta al Públicu.
La propuesta ta pensada precisamente pa que collaborar nun signifique tener que disponer de cuatro díes completos. Pue participase por díes y por turnos, indicando nel formulariu cuándo se tien disponibilidá, y la duración concreta de cada colaboración va alcordase ente la organización y cada persona.
Eso abre la puerta tanto a quien quiera implicase intensamente nel SISGA como a quien namás pueda dedicar una mañana o una tarde.
Muncho más que “echar una mano”
El voluntariáu permite ver una cara del SISGA que’l públicu normal nun conoz: la preparación de los espacios, la llegada de productores, les acreditaciones, la coordinación de les actividaes y tol trabayu que fai posible qu’un alcuentru internacional funcione.
Les funciones son, amás, bien diverses. La organización busca collaboradores pa recepción y acreditaciones, información y atención al públicu, apoyu na Tastia Abierta, acompañamientu a productores internacionales, visites, presentaciones y tasties, comunicación, fotografía, vídeo, redes sociales y lloxística. La intención ye asignar les funciones teniendo en cuenta los intereses, la experiencia y la disponibilidá de cada persona.
Nun fai falta ser especialista en sidre nin tener experiencia previa. Sí se valoren conocimientos d’idiomes, atención al públicu, organización d’eventos, comunicación o conocencia del sector sidreru. Los idiomes tienen un interés especial nun certame que recibe productores ya invitaos de distintos países, porque permiten collaborar directamente na so atención y acompañamientu.
Y esi ye precisamente unu de los grandes atractivos de la propuesta: nun se trata namás de trabayar nun eventu, sinón de metese de lleno nel ambiente internacional del SISGA, conocer a persones venceyaes a cultures sidreres distintes y vivir dende dientro unos díes nos que Asturies se convierte nun puntu d’alcuentru pa productores, profesionales y aficionados a la sidre.
El sábadu, el día grande pal voluntariáu
La xornada na que más collaboradores se precisen va ser el sábadu 26 de setiembre, cola Tastia Abierta al Públicu nel Palaciu de Congresos del Recintu Ferial Luis Adaro, en Xixón.
Va haber dos sesiones, de 12:00 a 15:00 y de 17:00 a 20:00 hores, con sidres participantes, productores atendiendo directamente al públicu, tasties guiaes y harmonizaciones con productos d’Alimentos del Paraíso. Antes de l’apertura, ente les 10:00 y les 12:00, ta programáu’l montaxe de los puestos, y al terminar la sesión de tarde va desarrollase’l desmontaxe.
Ye, por tanto, la xornada na que’l SISGA presenta la so cara más abierta y multitudinaria y tamién una de les meyores oportunidaes pa conocer directamente la enorme diversidá de la sidre que se produz güei fuera y dientro d’Asturies.
Acreditación, seguru y certificáu
La participación nun queda nun simple compromisu informal. El SISGA proporciona información previa, acreditación de voluntariáu y el material necesario pa realizar les funciones asignaes. Inclúi tamién seguru d’accidentes y certificáu de colaboración.
Les comíes tán cubiertes parcialmente dependiendo de la duración y del horariu de cada turnu, y cuando les actividaes rican desplazamientos a Villaviciosa o Nava, estos son organizaos pol SISGA.
La única condición xeneral que recueye’l formulariu ye ser mayor de 18 años.
La inscripción faise directamente en sisga.info, nel apartáu de Voluntariáu, indicando los díes y turnos disponibles, idiomes, experiencia —si la hai— y les árees nes que cada persona preferiría collaborar. Dempués, la organización contactará individualmente coles persones inscrites p’alcordar función y horariu.
Pal que tenga curiosidá pola sidre, polos eventos, pola comunicación, polos idiomes o simplemente quiera conocer xente y participar d’una experiencia distinta, esti añu’l SISGA ofrece una posibilidá poco habitual: nun contemplalu dende fuera, sinón formar parte d’él.
