Inicio > Cultura sidrera > El CSAM entama n’Aramil una xornada práutica d’ellaboración de sidre

El CSAM entama n’Aramil una xornada práutica d’ellaboración de sidre

Encuentro sidrero del Club Sierense Amigos de la Sidra

Semeya d’archivu de la xinta d’hermandá del CSAM nel Cuitu, el 25 de xunetu de 2026. Fonte: LA SIDRA.

El CSAM convoca a socios y socies el sábadu 21 de payares a les 9:30 nel Cuitu, n’Aramil, pa una mañana de llagarada, destilación y sidre de xelu y d’espolleta.

El Club Sierense d’Amigos de la Mazana (CSAM) convoca a socios y socies esti sábadu 21 de payares, a les 9:30 hores, nes sos instalaciones del Cuitu, n’Aramil (Siero). La xornada da continuidá a los cursos d’ellaboración de sidre casero del club y va repasar, con trabayu nel llagar, la sidre tradicional, la sidre de xelu, el vermú de sidre de xelu, les sidres d’espolleta y l’auguardiente de sidre.

Una llagarada y tres trabayos en paralelo

Les persones asistentes van poder participar nuna nueva llagarada y conocer los pasos principales del procesu. El mosto que salga va destinase a sidre tradicional y a sidre de xelu. En paralelo, va facese una primera concentración de mosto pa sidre de xelu, cola que se van ver los controles de la desconxelación y de la concentración.

A primera hora va ponese en marcha l’alambique pa destilar auguardiente de sidre. El cursu va siguir la preparación del equipu, el control del calentamientu y l’entamu de la destilación, con atención a la separación de les cabeces y a la evolución de la graduación. La mañana inclúi tamién un degüelle de clarificación d’una sidre d’espolleta, que va servir pa esplicar cómo se retira’l sedimentu de la botella y qué pasos vienen depués.

Confirmación y espicha

Como n’otros alcuentros del CSAM nel Cuitu, la xornada va rematar compartiendo mesa. Nesta ocasión, el programa anuncia una espicha pequeña al final de la mañana. La secretaría del club pide confirmar l’asistencia respondiendo a la convocatoria o per WhatsApp.

El CSAM comunica tamién que la so lotería de Navidá yá s’escosó y que tien númberu pa la de Reis. Va informar nos próximos díes del númberu y de la venta.

(Visited 3.680.521 times)
Redacción LA SIDRA
Redacción de LA SIDRA, revista especializada na cultura de la sidre. Publicamos noticies y reportaxes sobre llagares, gastronomía y actualidá sidrera asturiana y internacional.
https://www.lasidra.net