La banda suiza de folk metal protagonizó una de les actuaciones más prestoses de la edición de 2026, amestando guitarres de metal estremu con vigulín, gaita y sonoridaes tradicionales.
Eluveitie actuó’l 6 d’agostu nel Espace Jean-Pierre Pichard, dientru la 55 edición del Festival Intercélticu de Lorient. La xornada cuntó tamién cola participación de Tanork, ganaor del programa bretón Taol-Lañs, a mou de collaboración.
La presencia’l grupu amplió les fronteres musicales d’un festival tradicionalmente venceyáu a les bandes de gaites, el baille y les distintes anovaciones del folk atlánticu, amestando tamién a Suiza a les naciones celtes representaes davezu. El violín, los whistles, la gaita, la mandolina y l’harpa xuniéronse coles guitarres llétriques, batería y les voces guturales carauterístiques d’esti grupu.
Eluveitie surdió nel 2002 pñde man de Christian ‘Chrigel’ Glanzmann col envís de xunir el metal modernu coles antigües tradiciones celtes. Algamó una amplia proyeición internacional con Slania, espublizáu en 2008, y desendolcó dende entós un estilu propiu basáu nel death metal melódicu, los instrumentos tradicionales y les referencies a la hestoria y mitoloxía de l’antigua Galia, amás d’una importante referencia a la so llingua.
La formación qu’aportó a Lorient tuvo al frente a Glanzmann, responsable de les voces guturales, la gaita, los whistles, la mandolina y el bodhrán. Xuntu a elli actuaron Kay Brem al baxu, Rafael Salzmann na guitarra solista, Jonas Wolf na guitarra tamién y Alain Ackermann na batería.
Fabienne Erni llevó les voces llimpies, l’harpa celta y la mandolina, mentantu que Lea-Sophie Fischer féxolo col vigulín. El contraste ente les voces de Glanzmann y Erni marcó bona parte del conciertu, con Fischer comu finxu ente los pasaxes metálicos y les melodíes de bas tradicional, munches d’elles bretones nel so orixe, como ‘Tri Martolod’, reinterpretada en ‘Inis Mona’.
L’actuación formó parte de la presentación de Ànv, caberu álbum d’estudiu d’Eluveitie, espublizáu’l 25 d’abril de 2025. El discu afondó na mitoloxía y les tradiciones celtes con una producción más moderna y una presencia destacada de los instrumentos acústicos. El so caberu cenciellu foi ‘Taranoias’.
Enantes del so pasu per Bretaña, Eluveitie amosó la xira europea Ànv Rising xunto a Infected Rain y Ad Infinitum. Tamién participara na xira Blood Dynasty d’Arch Enemy, col compangu d’Amorphis y Gatecreeper.
El conciertu perafitó que’l metal y l’interceltismu podíen compartir escenariu perfechamente. Eluveitie aportó a Lorient una propuesta na que les melodíes antigües, los instrumentos tradicionales, les voces guturales y el folk metal européu más icónicu formaron parte d’un mesmu llinguax.
