La sidre va tornar ocupar esti mes d’agostu un espaciu cimeru en Xapón cola cellebración del Nippon Cider Matsuri (SISGA Japan), la versión xaponesa del Salón Internacional de les Sidres de Gala (SISGA) que ca añu cellébrase n’Asturies demientres la cabera fin de selmana de setiembre. Un proyeutu que ñació de la esperiencia asturiana y que, tres l’ablicante acoyía algamada en Xapón, llega yá a la so segunda edición.
L’alcuentru afítase acullá d’una reprodución del SISGA a miles de kilómetros de distancia. Trátase d’una adautación al mercáu xaponés d’una iniciativa que tien como determín l’espardimientu de la cultura internacional de la sidre, averar productores y consumiores y amosar la estraordinaria bayura qu’esiste anguañu alrodiu la mazana y los sos derivaos.
Detrás d’esta iniciativa ta la Fundación Asturies XXI, entidá asturiana enfotada dende va años na promoción internacional de la cultura sidrera y na organización del SISGA. La so participación nel Nippon Cider Matsuri fai por caltener un venceyu direutu ente l’alcuentru que se desendolc en Xapón y l’eventu orixinal asturianu.
El SISGA algamará esti setiembre a la so 16.ª edición, dempués d’un espoxigue nel que foi xorreciendo progresivamente tantu’l númberu de países representaos como la calidá de los premios.
El saltu a Xapón foi una consecuencia ñatural d’esa proyeicuón internacional. L’interés esistente nel país asiáticu pola sidre y polos productos venceyaos a territorios concretos abrió la posibilidá de treslladar la filosofía del SISGA al públicu xaponés, gracies a los nuesos embaxaores ellí. L’ésitu de la esperiencia permitió da-y continuidá y llegar esti agostu a una segunda edición del SISGA Japan, perafitándose como eventu hermanu al que se desendolca n’Asturies.
Ún de los elementos más bultables d’esta nueva edición ye la intensa campaña publicitaria que se ta desendolcando demientres tol branu en Xapón en xeneral y en Tokio en particular. La promoción del Nippon Cider Matsuri nun se llenda a los cartelos, pasquinos, periódicos nin a la difusión al traviés de les redes sociales y otros soportes habituales.
La imaxe del alcuentru ta llegando tamién a dalgunos de los espacios de tresporte con mayor circulación de viaxeros del mundiu. Durante’l branu tán difundiéndose vídeos promocionales nes llinies de tren bala xaponeses, al tiempu que l’eventu tien presencia audiovisual na rede JR de Tokiu, ún de los sistemes de tresporte utilizaos diariamente por millones de presones nel área metropolitana de la capital xaponesa.
La campaña supón una dimensión promocional especialmente relevante pa un alcuentru especializáu en sidre. L’oxetivu ye sacar esta bebida de los círculos esclusivamente profesionales o especializaos y presentala énte un públicu munchu más ampliu. Viaxeros, trabayaores, turistes y usuarios del tresporte públicu puen atopase nos sos desplazamientos cola imaxe del Nippon Cider Matsuri y escubrir asina un universu sidreru que quiciabes fasta esi momentu-yos resultaba desconocíu.
Esa valiente apuesta pola divulgación encaxa dafechu cola filosofía del SISGAJapan. Nel eventu de Tokio ca país participante va aportar variedaes de sidre, téuniques, estilos, gastronomía y formes sociales diferentes alrodiu d’un mesmu productu.
Xapón refuercia esti multitudinariu escenariu pal intercambiu y el Nippon Cider Matsuri fai por poner en contautu la cultura sidrera xaponesa con otres tradiciones sidreres y, al empar, averar al públicu xaponés una realidá que s’atopa en plena espansión y tresformación.
El proyeutu cuenta amás cola collaboración de CIDERCITIES, asociación internacional de la sidre, según de la Rede Europea de Ciudaes de la Sidre, una cadarma de cooperación que desendolca iniciatives y proyeutos alrodiu la produción de la mazana y la sidre.
L’actividá d’esta rede aníciase d’una idea fundamental: detrás de la sidre hai munchu más qu’una bébora. Hai pumares, variedaes tradicionales de mazana, productores, investigación, padremuñu, paisax, gastronomía, tradición, turismu y toa una cultura xenerada va xeneraciones nel ámbitu d’un productu que ye n’Asturies seña d’identidá. La presencia d’estes entidaes nel SISGA Japan amplía, poro, l’algame del alcuentru y conéutalu con proyeutos internacionales que trabayen sobro’l futuru de los territorios sidreros.
P’Asturies, la cellebración xaponesa representa tamién una importante oportunidá de proyeición esterior. La sidre forma parte de los ellementos culturales más reconocibles del país, pero eventos como’l SISGAJapan permiten presentala dende una perspeutiva contemporánea: como tradición, pero tamién como actividá económica xorreciente, innovación, agricultura, patrimoniu, gastronomía y puntu d’alcuentru ente cultures.
La esistencia de dos potentes eventos venceyaos ente sí, ún en Xapón n’agostu y otru n’Asturies a finales de setiembre, exemplifica la evolución internacional algamada pol proyeutu. La segunda edición del Nippon Cider Matsuri llega tres la bona respuesta consiguida anteriormente, mentantu’l SISGA asturianu va yá la so decimosesta convocatoria.
