Una dellegación de 150 presones va participar del 31 de xunetu al 9 d’agostu na edición 55 del Festival Intercélticu d’An Oriant, dedicada a Cornualles.
Con ello cellebra tamién cuatro décades de presencia institucional nel Festival Intercélticu, ún de los cimeros alcuentros internacionales de les cultures celtes. La dellegación asturiana va presentar más d’una quincena de propuestes de música, baille, canción tradicional, cine y artes plástiques.
La representación va incluyir a la Banda de Gaites El Gumial, el Grupu Etnográficu L’Oriente-Llacín, Rubén Alba, Llevólu’l Sumiciu, Herbamora, Ferla Megía, Entós y Rellume. Tamién va participar La Tarabica, banda de gaites del Centru Asturianu de Guadarrama.
El gaiteru y presidente de la dellegación Iñaki Sánchez Santianes va actuar comu solista xuntu al compositor Shaun Davey y la Orquesta del Festival Intercélticu.
La canción asturiana va tar representada por Alicia Villanueva Megido, Esteban Verdeja Martínez y Néstor Díaz González, ganaoores del II Premiu Nacional d’Asturianada Obdulia Álvarez ‘La Busdonga’.
Diego Lobo Tuñón, Pelayo Cordero, Pelayo Suárez y Nel Cortizo van competir nel Troféu MacCrimmon y Lobo va impartir amás una clase maxistral, mentantu que Francisco López Delgado y Eduardo Llosa formarán parte del xuráu.
La programación asturiana va completase cola proyeición de ‘Muyeres’, dirixida por Marta Lallana, y la esposición ‘Apuntes desde Bretaña: pintores españoles en el Finisterre francés’, comisariada por Luis Feás.
El Gran Desfile de les Naciones Celtes, los concursos instrumentales y los espectáculos nocherniegos van volver convertir Lorient nel gran escaparate de les cultures celtes un añu más.
