La Sidrería La Galana acueye esti vienres la entrega premios del XVII Concursu Internacional de Semeyes LA SIDRA y la naguración de la esposición coles 20 semeyes finalistes d’esta décimo sétima edición d’esti concursu
LA SIDRA.- La Sidrería La Galana, na Plaza Mayor de Xixón, va ser esti vienres 14 payares, a les 20 hores, l’escenariu de la entrega premios y la naguración de la esposición del XVII Concursu Internacional de Semeyes LA SIDRA, un certame que se reafirma como referencia internacional na fotografía dedicada al mundiu sidreru.
Entamáu pola Fundación Asturies XXI, col patrocinio del llagar Sidra JR y la collaboración artística y téunica de la Asociación Asemeyando, el concursu sigue consolidando la so posición como escaparate artísticu de la cultura de la sidre y del padremuñu cultural inmaterial asturianu.
Eduardo San Vicente, ganador de la edición
El Primer Premiu, dotáu con 700 € y la Medaya d’Oru de la Confederación Española de Fotografía (CEF), recayó nel fotógrafu rioxanu Eduardo San Vicente pola obra “Gotes que cuenten hestories: escanciando tradición”, una imaxe d’alta carga simbólica que recueye’l momentu del escanciáu como emblema universal de la sidra asturiana.
El Segundu Premiu, con 200 € y la Medaya de Plata CEF, foi pa Juan Carlos Hernández Fernández por “Siempres ta con nós”; el Tercer Premiu, con 100 € y la Medaya de Bronce CEF, recayó en Francisco J. Domínguez García por “Sidre cardiosaludable”.
La Mención Especial Sidra JR, dotada con 100 € y dos caxes de Sidra JR, foi pa Óscar Chamorro Flórez pola obra “Llavaderu de botelles”, un homenaxe visual al trabayu artesanal nos llagares asturianos.
Un xuráu de prestixu y gran nivel artísticu
El xuráu tuvo presidíu pol fotógrafu asturianu Luis José Vigil-Escalera, conocíu como Lujó Semeyes, Mayestru de la CEF y Excelencia FIAP. Destacóse’l gran nivel artísticu de les semeyes presentaes y la calidá narrativa de les composiciones, que refleten la vitalidá de la cultura sidrera.
Presencia institucional na entrega
Na ceremonia d’entrega ta prevista la participación d’Esther Freire, diputada na Xunta Xeneral, amás de conceyales del Ayuntamientu de Xixón, esperándose la presencia ente ellos de Guzmán Pendás, que yá participara na entrega de la edición pasada.
La presencia institucional pon de manifiestu’l xorreciente prestixu d’esta cita cultural, que xune arte, tradición y compromisu col territoriu.
Una esposición con vocación internacional
Les esposiciones de les semeyes finalistes del concursu entamen esti mes de payares en La Galana y van continuar próximamente nel Muséu de la Sidre d’Asturies (Nava). A lo llargo de 2026, la muestra itinerante “Semeyes de LA SIDRA” percorrerá estremaes ciudaes europees integraes na rede Cider Cities, fortaleciendo los llazos culturales ente los territorios sidreros d’Europa.
Esta itinerancia internacional busca amosar la sidre como símbolu d’identidá y productu cultural compartíu, contribuyendo a la promoción d’Asturies como referencia europea del mundiu sidreru.
Sofitu institucional y cultural
El concursu y les sos esposiciones desendólquense gracies al patrocinio del llagar Sidra JR y a la subvención de la Conseyería de Cultura, Política Llingüística y Deporte del Principáu d’Asturies, que respalden la promoción del padremuñu sidreru como una espresión viva y universal de la cultura asturiana.
