Cellebraráse’l prósimu 28 xunetu en L.luarca, Valdés
LA SIDRA.- La capital del conceyu Valdés acoyerá’l próximu domingu 28 xunetu la primer edición de la Gaita Sidrera, un alcuentru que naz col enfotu de poner en valor dos de los símbolos más fondamente venceyaos a la identidá asturiana: la música tradicional y la sidre. La cita va cellebrase na plaza Alfonso X El Sabiu, de magar les 19:00 hores, y promete ser una de les grandes fiestes del branu nel occidente asturianu.
Entamada por colleutivos culturales de la fastera col sofitu del Conceyu Valdés, la Gaita Sidrera busca consolidase como referente festivu y cultural, amestando la fuercia del folclor col calter afayaízu y popular de la sidre n’Asturies.
Música, memoria y raigaños
Nel escenariu van actuar dalgunes de les bandes más destacaes del país: El Enxambre, El Gumial y La Reina del Truébano, una de les formaciones más prestixoses d’Asturies, dirixida pol mayestru gaiteru L.luis Feito. Tamién va tar presente la compañía Xunta Pol Reñacer del Folklor, que va poner n’escena l’espectáculu Xugar nes costumes, una propuesta que xune danza, música y tradición oral asturiana.
Ún de los momentos más emotivos de la xornada va ser l’homenaxe a Fernando Rodríguez Pérez, conocíu como “Fernando L.luarca”, persona mui venceyada a la cultura tradicional del conceyu y mui quería pola so trayeutoria como transmisor del padremuñu musical asturianu.
Sidre y gastronomía como exes de la folixa
La sidre va tener tamién un papel protagonista nesta xornada. Por 5 euros, los asistentes van poder mercar un vasu comemorativu que-yos va dar drechu a tastiar estremaes sidres asturianes. Amás, va haber puestos gastronómicos con productos de la fastera y xinta tradicional, que van sirvir p’acompangar los culinos con auténticu saborgu a casa.
La plaza va tresformase nun espaciu d’alcuentru y folixa, onde se mesturen los sones de la gaita, el saborgu de la sidre y l’afalagu valdesanu.
Un proyeutu con futuru
La Gaita Sidrera naz con vocación de futuru, con ganes de convertise nun eventu añal, impulsando’l turismu cultural, animando la vida social de L.luarca y perafitando’l valor de les tradiciones populares nun momentu nel que la cultura sidrera asturiana foi reconocía pola UNESCO como Padremuñu Cultural Inmaterial de la Humanidá.
“La idega ye que esta fiesta seya abierta, pa toles edaes, y con personalidá propia; un día pa xuntanos al rodiu de lo que somos: música, sidre, llingua, memoria y folixa”, desplicaron los entamaores.
Con too preparao pal so estrenu, la Gaita Sidrera perfílase como una xornada pa esfrutar, deprender y brindar. L.luarca perafítase asina como un llugar vivu, onde la cultura tradicional asturiana tien voz, soníu y saborgu.
