La edición de 2026, dedicada a Cornualles, alxuntará del 31 de xunetu al 9 d’agostu a cientos d’artistes de los territorios celtes. La dellegación asturiana va cellebrar cuarenta años de participación istitucional nun escaparate internacional onde la música, el padremuñu, la gastronomía y la sidre formen parte d’una mesma identidá atlántica.
La ciudá bretona de Lorient (An Oriant) va tornar convertise esti branu nel gran puntu d’alcuentru de les cultures celtes. La edición 55 del Festival Intercélticu va tener a Cornualles comu territoriu protagonista y una programación formada por conciertos, desfiles, concursos instrumentales, bailles, esposiciones, cine y delles actividaes culturales y divulgatives.
El festival axunta cada añu a una selleición músicos, cantantes y artistes procedentes de Bretaña, Asturies, Galicia, Irlanda, Escocia, Gales, Cornualles y la Islla de Man, amás de representantes de comunidaes celtes d’otros continentes y de la diáspora, como Acadia o Australia.
La edición d’esti añu va tener un significáu dafechu destremáu pa Asturies, que conmemora cuatro décades de presencia istitucional en Lorient. Dende aquella primera participación oficial de 1986, el festival perafitose comu ún de los escaparates internacionales cimeros p’amosar la bayura de la cultura asturiana.
La dellegación de 2026 va tar formada por unes 150 presones y va presentar más d’una quincena de propuestes venceyaes a la música tradicional, les nueves tendencies en músic, la dancia, l’asturianada, el cine y les artes plástiques.
Ente los participantes atópense la Banda de Gaites El Gumial, el Grupu Etnográficu L’Oriente-Llacín y formaciones como Rubén Alba, Llevólu’l Sumiciu, Herbamora, Ferla Megía, Entós y Rellume, amás de gaiteros de reconocíu prestixu como Iñaki Sánchez Santianes. L’asturiananda va tar representada polos ganadores del II Premiu Nacional d’Asturianada Obdulia Álvarez ‘La Busdonga’. La gaita va tornar tener una presencia destacada nel Troféu MacCrimmon, mentantu que intérpretes mozos asturianos van participar nos programes de formación y intercambiu musical del festival.
