La Revista LA SIDRA participa estos díes na CiderCon, la gran cita internacional del sector sidreru que se celebra en Providence (Rhode Island, EE. UU.), col envís de siguir afondando nel conocimientu de la sidra nel mundu y, al mesmu tiempu, dar visibilidá a la cultura sidrera asturiana nun escenariu global.
La presencia nesti alcuentru profesional supón una oportunidá estratéxica pa dar mayor proyección a la sidra d’Asturies, compartiendo la singularidá del nuesu modelu sidreru, la so cultura, la so historia y la so rellación fonda col territoriu. Esta presencia internacional refuerza’l papel d’Asturies como territoriu de referencia nel universu sidreru. Per otru lláu, nel marcu de la CiderCon, LA SIDRA ta aprovechando tamién pa buscar participantes y establecer contautos de cara a una nueva edición del Salón Internacional de les Sidres de Gala (SISGA), una cita clave que se celebra en Xixón y que se consolidó como un puntu d’alcuentru fundamental ente productores de sidra d’alta calidá de tol mundu.
De la mesma manera, tán manteniéndose reuniones específiques pa dar a conocer la filosofía de “Cider Cities”, una iniciativa que promueve la cooperación ente ciudaes y territorios venceyaos a la sidra, poniendo en valor la so dimensión cultural, turística y económica. L’oxetivu ye siguir teciendo redes internacionales que refuercen la sidra como elementu vertebrador de comunidaes y como motor de desarrollu sostenible. Nesi sen, tamién ta dándose visibilidá a la ciudá de Xixón como destín turísticu.
Amás, la CiderCon ye una oportunidá perinteresante pa conocer de primer man les nueves tendencies del sector, intercambiar esperiencies con productores de los Estaos Xuníos y reforzar la idea de la sidra como productu cultural, identitariu y con proyección internacional. Dende LA SIDRA, l’asistencia a talleres, ponencies y espacios de debate forma parte d’un procesu continuu d’aprendizaxe y escucha activa de lo que ta pasando nel ámbitu sidreru mundial.
Cola participación de LA SIDRA na CiderCon reafírmase’l compromisu de la revista col espardimientu, la conexón internacional y la defensa de la cultura sidrera asturiana nun contextu cada vez más global, nel que ye imprescindible que la sidra asturiana tea mui presente.
