II Xornaes de la Sidre en Carbayín Altu

Ayeri cellebráronse les II Xornaes de la Sidre en Carbayín Altu, tres faer un paréntesis l’añu pasáu por mor a circustancies presonales de varios miembros de la organización.

LA SIDRA.- L’eventu tuvo llugar na plaza Julio Ordóñez de dicha llocalidá y foi entamada pola Peña Milwaukee, compuesta por ocho miembros, con Carlos Suárez de cabezaleru. Dicha peña escomenzó la so andaura va 10 años, cuando varios rapazos xuntáronse pa recaldar fondos destinaos  a la carroza que presentaben na popular fiesta de Valdesoto.

Anguañu participen tamién los miembros de les sos respeutives families, atendiendo los puestos de venta de xinta y vasoso o bien ufriendo papeletes pa la puya d’un xamón que se cellebrará’l díi 7 del presente mes. Asina mesmo, los negocios de la fastera, como l’obraor Ricopan, la sidrería Casa Bernardo, el Cientru Cultural Nuesa Señora de Cuadonga, el taller d’artesanía Daniyaiza Fecho a Man, o el bar La Buena Viña de La Pola Siero, también colaboraron nes xornaes.

La idega principal de la cellebración d’esti eventu, que tien a la sidre como protagonista, ye la de dar puxu a la vida nel pueblu de Carbayín, camentando incluyir otres actividaes d’un díi como unmercáu artesanu o la cellebración d’un magüestu n’ochobre.

Tres contautar con varios llagares por mediu d’integrantes dela peña o chigres de la fastera, les xornaes escomenzaron la so andaura en 2017. Amás de la sidre casero presentao nesta edición, los llagares participantes fueron Orizón, Furaco (bodega Somonte), Alonso y Riestra, que participó con dos palos, al incluyirla so sidre seleicionada Ribayu na tastia.