La mítica sidrería celta Endovélico reabre les sos puertes en Porto cola DOP Sidre d’Asturies como protagonista.
LA SIDRA.- La reapertura de la sidrería celta Endovélico, na ciudá portuguesa de Porto, supón la recuperación d’ún de los principales escaparates internacionales de la cultura sidrera asturiana fuera d’Asturies. Considerada en Portugal como la primer sidrería especializada del país, Endovélico convirtióse dende’l so aniciu nun espaciu de referencia dedicáu a la sidre, a la gastronomía celta y a la difusión de les principales cultures sidreres europees.
La nueva etapa del llocal inauguraráse’l prósimu 13 de xunu con un actu protagonizáu pola Denominación d’Orixe Protexida Sidre d’Asturies, reforzando los históricos venceyos ente’l sector sidreru asturianu y un establecimientu que, a lo llargo de los años, contribuyó decisivamente a dar a conocer les sidres asturianes ente’l públicu portugués.
La nueva sede d’Endovélico allúgase na Rua dos Mártires da Liberdade, 29, nel centru históricu de Porto, un emplazamientu privilexáu que permitirá siguir ampliando’l so llabor de difusión de la cultura sidrera y de promoción de les sidres de calidá.
Fundáu por Maria José Valente y Jaime Filipe Barros, Endovélico nació cola voluntá de crear en Porto un espaciu únicu dedicáu a la tradición celta y a la cultura de la sidre. Col tiempu, el llocal consolidóse como un puntu d’alcuentru pa productores, divulgadores y aficionaos, acoyendo degustaciones, presentaciones y actividaes venceyaes al mundu sidreru internacional.
Consideráu como un auténticu «paraísu de la sidre», cuenta con una de les mayores ufiertes de sidres del país y la so actividá resultó fundamental pa popularizar la cultura sidrera en Portugal. Esa trayeutoria convirtió a Endovélico nun referente non solo a nivel portugués, sinón tamién internacional, como puente ente les principales rexones productores d’Europa y como embaxador oficial del Salón Internacional de les Sidres de Gala, que se cellebra n’Asturies la postrera fin de selmana de setiembre.
La reapertura confirma’l papel estratéxicu d’Endovélico na proyeición internacional de la DOP Sidre d’Asturies y afita nuevamente a Porto como ún de los principales puntos de difusión de la cultura sidrera asturiana fuera de les sos llendes.
