La cultura sidrera sigue demostrando que ye tamién una ferramienta de futuru pa les zones rurales d’Asturies. El cultivu de la mazana, los llagares y l’actividá económica venceyada a la sidra conformen un modelu de desenvolvimientu venceyáu al territoriu, capaz de xenerar emplegu y caltener población.
La publicación ¿Qué ye la Cultura Asturiana de la Sidra? destaca’l valor ambiental de les pumarades tradicionales, qu’afavorecen la biodiversidá y formen parte esencial del paisaxe asturianu. Tamién recuerda la reutilización de subproductos y la llarga vida útil de la botella tradicional, exemplos claros d’economía circular. La espublización cunta col sofitu de la Conseyería de Cultura, Política Llingüística y Deporte.
Amás, la sidra representa una actividá económica non deslocalizable, especialmente importante en conceyos rurales que busquen oportunidaes nueves ensin perder les sos señes d’identidá.
Nel actual escenariu de despoblación y cambéu social, la cultura sidrera apaez como un exemplu de cómo tradición y innovación puen caminar xuntes.
