La tonada volverá sonar polos chigres y cais de Villaviciosa esti domingu cola cellebración de “La Villa EnToná”, una iniciativa impulsada pola Asociación d’Intérpretes de Canción Asturiana (AICA) col sofitu del Conceyu Villaviciosa, la Banda de Gaites de Villaviciosa y l’asociación comercial Acosevi. La xornada tamién servirá como homenaxe al 40 aniversariu de la Banda Gaites maliaya.
LA SIDRA.- La propuesta pretende recuperar una tradición que foi habitual per toa Asturies: canciar pelos chigres de manera espontánea, especialmente nes hores del vermú y nes xuntances populares. Los entamoaores despliquen que’l proyeutu quier devolver esi ambiente de tonada compartida ente intérpretes y públicu, una costume que foi perdiéndose col pasu los años y la llexislación restrictiva española.
“La Villa EnToná” entamará a les 11:30 hores y repartirá actuaciones musicales per distintos establecimientos y espacios del centru Villaviciosa. Na actividá participarán intérpretes profesionales de canción asturiana y tamién pequeños grupos venceyaos a la Banda Gaites de Villaviciosa. Amás, los enatmaores animen a vecinos y visitantes a sumase al ambiente musical de manera abierta y participativa.
La cita xune asina música tradicional, vida social y reconocencia a una de les formaciones culturales más representatives del conceyu maliayu, nuna mañana que quier convertir les cais y los chigres de La Villa nun espaciu d’alcuentru alredior de la tonada asturiana.
