La Plaza Cubierta de La Pola volvió convertise esti miércoles nel gran escaparate de la sidre con Denominación d’Orixe Protexida Sidra d’Asturies cola celebración de la decimoquinta edición del Salón DOP, una cita que presentó la campaña 2026 y qu’aconceyó a productores, llagareros, cosecheros, distribuidores, hosteleros y profesionales venceyaos al sector
Un total de 28 llagares participaron nel certame, nel que los asistentes tuvieron ocasión de conocer y tastiar les ellaboraciones amparaes pola denominación. La presencia de los propios llagareros nel actu convirtió la xornada nun espaciu privilexáu pa intercambiar impresiones sobre la collecha, les característiques de les sidres y los retos de futuru del sector.
La gran vencedora de la edición foi Contrueces, de Xixón, que llogró’l máximu reconocimientu na categoría de Sidra Natural Tradicional. Completaron el podiu Quelo, de Tiñana, que consiguió la plata, y Val de Boides, ellaborada por Sidra Castañón en Quintueles, que se fixo col bronce. Nes demás categoríes repitieron triunfu dos referencies de Sidra El Gobernador, de Villaviciosa: Españar, como meyor sidra filtrada, y EM, como meyor sidra espumosa. El reconocimientu al meyor cosecheru recayó en Juan Antonio Junco.
Amás de la tastia de les sidres participantes, el salón volvió destacar pola so apuesta por venceyar la bebida emblemática d’Asturies col restu de la producción agroalimentaria de calidá del país. Los asistentes pudieron acompañar les distintes sidres con una amplia representación de productos amparaos por distintes figures de calidá, ente ellos quesos asturianos, fabes, miel y carne de xata, creando un percorríu gastronómicu que permitió afondar nes múltiples posibilidaes d’harmonización de la sidre.
La xornada valió tamién pa nomar embaxadora de la DOP Sidra d’Asturies a la polesa Montse Tomé. La exseleicionadora nacional femenina de fútbol destacó nel so discursu’l valor cultural y social de la sidre, que definió como «muncho más qu’una bebida», al representar historia, tradición y una manera d’entender la vida.
Per otru llau, el presidente del Conseyu Regulador, Jorge García Álvarez, valoró mui positivamente la calidá de les nueves ellaboraciones, procedentes d’una cosecha de mazana que calificó de especialmente bona. Según señaló, la denominación atraviesa un momentu favorable y plantega ente los sos oxetivos siguir xorreciendo nos próximos años, tanto en ventes como na superficie dedicada al cultivu del pumar.
El Salón DOP Sidra d’Asturies volvió asina a convertise nun puntu d’alcuentru pa tol sector y nuna celebración colectiva de la cultura sidrera asturiana, onde productores, ellaboradores y consumidores pudieron conocer de primer mano les sidres que protagonizarán la nueva campaña.
