Esti agostu Tokio tornará a ser ún de los puntos cimeros pal alcuentru internacional de la sidra. Ye por mor del SISGAJapan, la edición xaponesa añal del Salón Internacional de les Sidres de Gala (SISGA), que averará a munchos productores xaponeses, internacionales y tol públicu aficionáu a la bona sidra de la capital nipona.
Tras l’ésitu descomanáu en 2025, qu’atraxo a miles de presones na so primera edición nun pudo ser d’otramiente más que siguir apostando por la cultura sidrera y el espardimientu de lo que ye la cultura sidrera asturiana y xaponesa, dambes comprometíes con la tradición ,la calidá y la viabilidá en mercáu ensin desdexar la proyeción internacional. Esta edición allugarase nel gran Amihabara UDX Gallery de Tokio el 30 d’agostu y ya tien confirmaos más participantes que l’añu anterior, y eso qu’entá falten 2 meses.
La diferencia ye qu’esti añu inclúyese la competición de sidres a xulgar por un xuráu xaponés, con cuota d’iscripción de 16.500 yenes per productu (89 €) con fecha tope el 15 de xunu pa presentales. Al empar que la versión asturiana del eventu, valorarase la calidá, la presentación, l’ausenciand’aditivos y los medios de produción que cumplan con criterios de calidá y caltenibilidá.
SISGAJapan naz comu una iniciativa en 2025 ente empresarios y llagareros xaponeses, la sidrería Kanda Eclipse First Sidreria de Tokio, la Fundación Asturies XXI —organizadora del Salón Internacional de les Sidres de Gala (SISGA)— y la asociación europea de la sidra CiderCities. L’enfotu ye afondar nos venceyos ente les destremaes zones sidreres y sofitar l’intercambiu cultural, la calidá del productu, la viabilidá nel mercáu y la proyeición internacional de les sidres d’altu nivel.
El festival acoyerá a productores de tou Xapón y dellos del estranxeru, ufriendo al públicu degustaciones, maridaxes gastronómicos, información sobro la tradición llocal sidrera de ca parte de la islla, talleres, conferencies, entrega premios y un espaciu d’alcuentru pa profesionales del sector. Dientru’l programa ún de los puntos fuertes sedrá’l desendolcáu pola delegación asturiana de la Fundación Asturies XXI, que fadrá un taller d’escanciáu xuntu con desplicación sobro la cultura sidrera asturiana. Esta parte de les conferencies averará al públicu xaponés una de les nueses más emblemátiques y más perafitaes tradiciones, seña d’identidá dende la más humilde sidrería de barriu fasta la capital xaponesa.
La presencia asturiana nel SISGAJapan enfótase precisamente n’afitar esi intercambiu de práutiques, conocimientos y esperiencies ente Xapón y Asturies, dos países con antigua tradición sidrera qu’apuesten por dar a conocer y dar a valorar un productu que merez más atención dao la so dimensión cultural, social, gastronómica y el papel que tien na identidá cultural del tarrén.
