La cita va cellebrase’l llunes 3 d’agostu, de magar les 18.30 hores, dientro de la xornada de clausura de les fiestes de San Félix
LA SIDRA.- Candás va cellebrar el llunes 3 d’agostu una nueva edición del Rally de la Sidre, una de les convocatories más multitudinaries y reconocibles del branu na villa marinera. L’entamu ta anunciáu pa les 18.30 hores y la inscripción xestiónase nel polivalente de Candás. La cita va poner el protagonismu sidreru a la última xornada de les fiestes de San Félix.
El nome de rally nun respuende a una competición, sinón a un percorríu festivu compartíu por peñes y grupos de collacios. Camisetes blanques, pañuelos, ropa de mahón y vasos de sidre tornen enllenar les cais nuna cellebración que foi xorreciendo col pasu de los años fasta convertise nuna de les grandes cites populares de Candás.
La convocatoria cuenta con una trayeutoria de participación bien destacada. Ente les ediciones anteriores llegó a superar les 3.000 persones participantes, mientres qu’en 2024 rexistró más de 2.800 inscripciones. Nun se dio a conocer, pel momentu, una cifra equivalente pa la edición de 2026.
El rally llega dempués d’una fin de selmana marcada pol Festival de la Sardina y la sidre y poles distintes actividaes de San Félix. Tres el percorríu, el programa va siguir a les 20.30 hores cola actuación d’Insolentes y, dende les 21.00, con Los40 Summer Live nel puertu. A les 23.00 hores va haber discoteca móvil y la Gran Descarga de medianueche va poner el ramu a los festexos.
El Rally va volver aconceyar asina a vecinos, peñes y visitantes alredor d’una de les espresiones más populares de la cultura de la sidre. Dende les seis y media de la tarde, la villa va recuperar una estampa que yá forma parte de les sos fiestes: cais atarraquitaes, ambiente de cuadrilla y un percorríu fechu, como manda la tradición, de culín en culín.
