Maley, con trés distinciones, y Rocco, con una, asitien a Italia al frente de los máximos reconocimientos del certame. Asturies y Chequia comparten la segunda posición, con trés Premium caúna.
Italia foi’l país que más premios Premium consiguió na decimosesta edición del Salón Internacional de les Sidres de Gala. El recuentu de la clasificación dexa cuatro distinciones pa los productores italianos, siguíos d’Asturies y Chequia, empataes con trés caúna. Un resultáu que pon el focu na diversidá d’ellaboraciones capaces d’algamar el máximu reconocimientu nes sos respectives categoríes.
El gran protagonista del ésitu italianu foi Maley, que reunió trés Premium con productos de families distintes: Cidre du Saint Bernard, na categoría de sidre d’espolleta con carbónicu natural semiseco; Poire Jorasses, na de perea semiseco; y Lo Cristallier, na de llicor de sidre. Trés reconocimientos que dan cuenta de l’amplitú de la so propuesta, con presencia ente les sidres, les ellaboraciones de pera y los llicores.
La rellación de Maley col SISGA vien de llueñe. El so impulsor, Gianluca Telloli, ta vinculáu a un proyectu de recuperación de pumares históricos del Val d’Aosta y Saboya. La so participación nel Salón incluyó la tastia inaugural de la edición de 2023, na que presentó la filosofía del llagar y la so vinculación col paisaxe y les variedaes tradicionales de mazana de los Alpes.
El cuartu Premium italianu foi pa Sparkling Rocco – Spicy Honey, de Rocco SRL, distinguíu na categoría de sidre d’espolleta con carbónicu amestáu dulce. Con esti premiu, Italia completó un palmarés repartíu ente dos productores y cuatro categoríes, con Maley como principal motor del resultáu.
Asturies compartió la segunda posición con Chequia, a una sola distinción d’Italia. Los trés Premium asturianos correspondieron a Exner Craft Cider, de Gallinal Drinks, na categoría de sidre d’espolleta con carbónicu amestáu semiseco; Ramos del Valle Brut, de Sidra Fran, na de sidre d’espolleta con carbónicu natural brut; y Sidra de hielo, de Sidra Cortina, na de sidre de xelu. La distinción d’Exner, participante nesta edición del SISGA, súmase asina a les de Sidra Fran y Cortina pa conformar la representación asturiana ente los máximos premiaos.
Pela so parte, Chequia consiguió los sos trés Premium con Magic Guelder-Rose 2025 Semi-dry, de Witch’s Apple Cider, en sidre de copa con saborgos; Opilý jabko, d’Apploader SRO, en sidre d’espolleta con carbónicu natural dulce; y Cousins Driver – Friendly, de Cousins, en sidre ensin alcohol.
El palmarés da continuidá a la diversidá internacional destacada na presentación del SISGA’26 y nel balance d’esta edición. El xuráu tuvo formáu por un representante de caún de los llagares participantes, incorporando a la valoración les distintes sensibilidaes y tradiciones de los territorios productores. Italia encabeza’l recuentu de Premium, con Asturies y Chequia compartiendo’l siguiente puestu nunos premios que reconocen formes mui diferentes d’entender la sidre.
