Vien d’espublizase la convocatoria d’ayudes destinaes a la restauración y conservación de llagares tradicionales con interés etnográficu asitiaos n’Asturies, anque la partía total ye namás de 50.000 euros.
LA SIDRA.- La convocatoria enmárcase dientro de les nueves bases reguladores aprobaes nel BOPA y tien como oxetivu favorecer la conservación del patrimoniu venceyáu a la cultura sidrera asturiana, reconocida como Bien d’Interés Cultural inmaterial dende 2014.
Les subvenciones podrán destinase a actuaciones de restauración y recuperación de prenses tradicionales —d’apertón, pesa, cepa o sobigañu—, asina como a obres de conservación de los edificios tradicionales venceyaos a los llagares.
Les ayudes tan dirixíes a particulares, asociaciones y fundaciones ensin ánimu de llucro con domiciliu social n’Asturies y actividá principal nel país.
Cada proyeutu podrá recibir fasta 15.000 euros, ensin superar en nengún casu’l 80 % del presupuestu subvencionable.
La resolución destaca especialmente’l valor patrimonial y etnográficu de los llagares tradicionales como espacios fundamentales de sociabilidá y cultura popular asturiana, venceyaos históricamente a la producción y consumu de sidra.
Les bases establecen como criterios de valoración:
- La singularidá o valor patrimonial de la prensa
- La vinculación cola edificación tradicional
- La esposición pública
- La calidá téunica del proyectu
- La contribución a la divulgación de la cultura de la sidrea.
Les actuaciones subvencionables podrán executase ente’l 1 de xineru de 2026 y el 31 de xunetu de 2027.
El plazu de presentación de solicitúes ye de quince díes hábiles dende la so espublización de la convocatoria nel BOPA, colo que finaríe’l prósimu 15 de xunu.
