El conceyu de Llanes va dar esti mes un pasu decidíu na promoción de la so cultura sidrera cola cellebración del II Concursu de Sidre Natural Casero, integráu dientru del XL Certame de la Güerta de Posada, que se va cellebrar los díes 16 y 17 d’agostu. L’oxetivu d’esti certame ye reconocer la meyor sidre ellaborao pa en casa y, al empar, escoyer les trés que van representar al conceyu nel Concursu de Sidre Casero d’Asturies 2025.
Sidre casero: un orgullu que formienta en Llanes
Na so segunda edición, esti concursu quier consolidase como una plataforma pa dar visibilidá a los llagares domésticos del conceyu. Pue participar cualisquier persona qu’ellabore sidre casero fecho nel conceyu, siempres que s’inscriba en plazu, fasta’l 12 d’agostu, al traviés del Conceyu o de la sede lletrónica.
Les sidres presentaes van sometese a una preseleición el sábadu 16, y la tastia final pública va cellebrase’l domingu 17 baxo una carpa instalada nel aparcamientu de FEVE en Posada. Les trés sidres meyor puntuaes recibirán troféu y premios económicos (120, 80 y 50 €), amás del reconocimientu de representar a Llanes a nivel asturianu.
Un escaparate pa los llagares tradicionales
Con esta cita, Llanes sigue impulsando la recuperanza de la cultura sidrera tradicional. La sidre casero, fecho con mazana propia y métodos heredaos, representa un patrimoniu que se quier caltener vivu. El xuráu va valorar el saborgu, l’arume y el comportamientu en vasu, igual que nos concursos profesionales.
Esta actividá forma parte d’un programa más ampliu, que tamién inclúi’l Certame de la Güerta con productos del campu, artesanía y la Feria del Campu del Oriente d’Asturies.
Más qu’una bébora: una manera de ser
Pa la organización, l’oxetivu ye “poner en valor la sidre casero como parte fundamental de la identidá llanisca”. La idega ye reforzar el llugar de Llanes dientru’l mapa sidreru d’Asturies y animar a la xente mozo a siguir con esta tradición viva.
