La revista LA SIDRA va tar presente en CiderCon 2026, la principal cita profesional de la sidre a nivel internacional, que se celebra esti añu en Providence (Rhode Island, EE. UU.), ente los díes 2 y 5 de febreru, nel Rhode Island Convention Center
Una delegada de LA SIDRA va desplazase hasta’l continente del otru llau de la mar pa cubrir l’eventu y facer llegar a productores, profesionales y públicos internacionales información sobre la sidre asturiana, la so cultura, la so historia y el modelu tradicional que la define como un productu identitariu y colectivu.
CiderCon ta entamada pola American Cider Association y xunta ca añu a productores, distribuidores, investigadores y proveedores de tol mundu. La edición de 2026 desendólcase baxo’l lema “Crafting Cider’s Future Together” (Construyendo xuntos el futuru de la sidre), con un programa centráu na formación técnica, l’análisis de tendencias, la innovación empresarial y l’intercambiu profesional.
Amás de les xornaes congresuales, l’eventu inclúi actividaes previes como visites a sidreríes de Connecticut y Rhode Island, un percorríu históricu centráu na Llei Seca na propia Providence y sesiones especiales nel Johnson & Wales University Culinary Arts Museum, onde sidre y gastronomía dialoguen dende una perspectiva cultural y sensorial.
La participación de LA SIDRA en CiderCon 2026 da continuidá al llabor de difusión internacional de la sidre asturiana desendolcáu pola revista n’ediciones anteriores, nes que se repartieron materiales informativos y publicaciones especializaes. L’oxetivu ye siguir tex
endo redes, amosar la singularidá de la cultura sidrera asturiana y facer visible, nel ámbitu internacional, un patrimoniu vivu que combina tradición, comunidá ya innovación.
D’esta manera, LA SIDRA refuerza’l so compromisu cola divulgación de la sidre como elementu cultural y social, llevando’l nome d’Asturies y la so cultura sidrera hasta escenarios globales onde s’alderica’l presente y el futuru del sector.
