El Cuetu, El Pedreru, La Fueya de Tomás y Cabranes
Cinco chigres de Xixón participen nes Xornades del Chuletón, una cita gastronómica yá afitada nel calendariu llocal, con menú tradicional de chuletón, Sidra Contrueces y productu de primer nivel
LA SIDRA.- Les Xornades del Chuletón yá tán de vuelta a Xixón y van celebrar la so decimosesta edición fasta’l prósimu 8 febreru, reafitándose como una de les cites gastronómiques más consolidaes del calendariu llocal. Nesta ocasión, cinco chigres de la ciudá tornen participar nuna iniciativa que, añu tres añu, caltién una alta aceptación ente’l públicu.
Tomás Borge, de La Fueya de Tomás, ún de los chigres participantes- señala que’l formatu de les xornades favorez la so bona acoyía: al cellebrase una vegada al añu y dexar espaciu ente ediciones, la propuesta sigue despertando interés, fasta’l puntu de recibir reserves enantes del entamu oficial.
Un menú que se caltién como clave del ésitu
La estructura del menú repítese respetando la fórmula que vien funcionando dende hai años. Inclúi cecina y muxones al estilu de cada casa, un kilu de chuletón de vaca vieya acompañáu de patates y pimientos, postre caseru y Sidra Contrueces, con dos botelles por menú pa dos persones.
El preciu queda fixáu en 78 euros pa dos comensales, una cifra que dende la organización consideren acordies cola calidá del productu que s’ufierta.
La carne, elementu central de les xornades
El productu protagonista torna llegar de la mano de Cárnicas Trasacar. El so responsable, Javier Trabadelo, esplica que pa esta edición seleccionáronse 50 chuleteros de raza frisona, una carne que precisa un procesu d’escoyeta bien curiáu pa garantizar un bon nivel d’engrasamientu y, con ello, una alta calidá final.
La carne sométese dempués a una maduración ente 20 y 25 díes, buscando l’equilibriu ente saborgor, xugosidá y tenrura. Amás, el menú inclúi cecina ellaborao colos cuartos traseros de les vaques, con un procesu de curación d’un añu.
Chigres participantes
Los cinco chigres de Xixón que tomen parte nesta decimosesta edición de les Xornades del Chuletón son:
- Los Pomares
- El Cuetu
- El Pedreru
- La Fueya de Tomás
- Sidrería Cabranes
Los entamaores destaquen l’alta profesionalidá d’estos llocales y de los sos equipos, asina como l’esfuerzu conxuntu pa caltener un menú de calidá a un preciu competitivu.
Con selce ediciones cellebraes, les Xornaes del Chuletón tán yá plenamente afitaes nel panorama gastronómicu xixonés. Como resume Tomás Borge, la propuesta ta “instituida” y la so aceptación sigue siendo total, tanto ente los veceros habituales como ente quien visiten la ciudá nestes feches.
