Ayer celebróse nel CIFP d’Hostelería y Turismu de Xixón un completu taller dedicáu a les sidres de xelu (con presencia tamién de sidre de fuéu), como actividá previa al entamu güei del Salón Internacional de les Sidres de Gala (SISGA).
Entamada pola Escuela de Sumillería, la cita valió p’afondar nos procesos d’ellaboración y tastia d’esti tipu de sidres, que ca vegada cuenten con más presencia nacional ya internacional.
La sesión arrancó a les cinco la tarde cola intervención d’Alfonso Castañón y Pedro Ramas, enólogu del Llagar Castañón, quienes amás de presentar el llagar a los asistentes -dellos foriatos, veníos pal SISGA- amosaron los métodos d’ellaboración de la sidre de xelu nel so llagar, xenerando un prestosu alderique colos llagareros presentes sobre cuestiones téuniques del procesu.
Darréu foi’l turnu de Juan Luis García, profesor del propiu CIFP, qu’aporfió nel importante papel que tien la hostelería y los sos trabayadores a la de popularizar el consumu de productos comu la sidre de xelu, non solo incluyéndolos na so carta sinón ufriéndolos a los veceros. Juan Luis guió a los participantes al traviés d’una tastia comparada de saborgos cientrada nos contrastes ente dulces y ácidos, pasando darréu a compartir y comentar delles sidres de xelu, entamando pola Bonagua, de Sidra Castañón, un productu d’escelente calidá, nuevu nel llagar y que s’ellabora n’edición llendada. Prebáronse tamién les sidres de Riestra, la ellaborada pol Clú Sierense d’Amigos de la Manzana, Iscider, Nohoval y la sidre de fuéu Kuartango.
La parte final del taller, a les siete, tuvo protagonizada pola profesora Benedicta Zurro, que presentó métodos de coctelería con sidre de xelu y convidó a los asistentes a prebar distintos cócteles ellaboraos con esta base, amosando la versatilidá y posibilidaes d’esti productu con unes creaciones que dexaron ablucaos a los presentes.
La xornada completóse cola visita al Llagar JR, a les nueve de la nueche, onde los participantes pudieron conocer dende dientro’l procesu d’ellaboración y compartir una degustación, poniendo asina’l ramu una intensa tarde que sirvió como aperitivu perfectu pal arranque del SISGA, que tendrá llugar esta mañana cola inaguración a les once la mañana a cargu del presidente de la Fundación Asturies XXI Marcos Abel Fernández y la tastia inagural de Stonewell cider, a cargu d’Eamon Dacey, abriendo asina cuatro intensos díes d’actividá sidrera.
