Nicolás Expósito, mayestru escanciador, ye una de les voces más respetaes de la cultura sidrera n’Asturies. La so rellación cola sidra escomenzó siendo un neñu, a los 11 o 12 años, cuando’l restaurante-hotel La Gruta, n’Uviéu, fo’l primer escenariu onde probó los sos primeros culinos en familia.
LA SIDRA.- La so carrera profesional entamó tamién con 17 años, cuando dio’l saltú a la barra tres trabayar previamente nuna cafetería y dempués un añu na Sidrería Asturias, na cai Caveda n’Uviéu. Foi ellí onde un compañeru del gremiu —que nun ta yá con nós— deprendió-y’l estilu, la postura y la téunica d’echar sidre, curiando que la sidre nun se machaque nel vasu y que’l corte de muñeca seya’l correutu.
La vocación polos concursos llegó rápido. Expósito algamó 42 primeros premios nos campeonatos grandes, repitiendo victories en conceyos como Xixón, Villaviciosa, Uviéu o Les Arriondes, anque en Nava solo venció una vegada. Nel 1995 foi proclamáu campeón oficial d’Asturies, pero’l reglamentu nun lu dexó repetir títulu pa favorecer el relevu xeneracional, anque por puntos tornaría quedar campeón en 1996 y 1997.
Güei, la so presencia nel campeonatu continúa, pero como miembru del xuráu del Campeonatu Oficial d’Echaores, llabor que desempeña dende hai cuatro años, cuasique cinco. Pa Nicolás, la participación de xente mozo y profesional ye’l motor del futuru: los caberos cinco años xubió muncho’l nivel, con un grupu de 16 a 18 echaores Sub-25 siempres na parte alta de la clasificación.
El so discursu va acullá de la téunica: reivindica la diferenciación del chigre tradicional. “Nun pue llamase sidrería a un llocal onde nun s’eche sidre”, sostién. Defende qu’un echaor abarca temperatura, serviciu, cultura y tratu, y considera que tendría d’haber formación profesional certificada n’echar sidre enantes d’abrir una sidrería.
Nuna dómina onde l’escanciáu automáticu y los tapones apaecen en dellos llugares, Nicolás defende la barra tradicional como espaciu social y cultural: un llugar onde se conversa, se comparte y se convive col llíquidu tratáu con rigor, respetu y oficiu. La sidre, pa elli, ye ADN, memoria y profesión, pero tamién identidad colleutiva.
VER ARTÍCULU COMPLETU EN LA SIDRA 260
