La hostelería de Cangues d’Onís dio un nuevu pasu nel so compromisu cola sidre de calidá al algamar un alcuerdu col Conseyu Regulador de la DOP Sidre d’Asturies pa ufiertar como primer opción nos sos establecimientos los productos amparaos pola Denominación d’Orixe Protexida. D’esta miente, la villa canguesa conviértese na sesta llocalidá n’afitase públicamente con esta marca de garantía, tres Tazones, Llastres, Candás, Llanes y Villaviciosa.
LA SIDRA.- L’anunciu visualizóse nun actu simbólicu xunto al Puente Romanu, onde una amplia representación de propietarios de chigres echó un culín de sidre pa escenificar el so sofitu a un productu ellaboráu con mazana cien por cien asturiana, y que xenera riqueza y emplegu nel mediu rural y na industria agroalimentaria del país.
Na xornada participaron tamién la directora xeneral d’Agricultura, Agroindustria y Desendolcu Rural del Gobiernu del Principáu d’Asturies, Begoña López; l’alcalde de Cangues d’Onís, José Manuel González; y el presidente del Conseyu Regulador de la DOP Sidre d’Asturies, Jorge García.
La iniciativa supón un respaldu importante pa la DOP Sidre d’Asturies nuna de les principales villes turístiques del oriente asturianu, onde la sidre forma parte esencial de la ufierta gastronómica y de la imaxe de la comarca. El compromisu de la hostelería llocal contribúi amás a enfortiar el valor de la producción venceyada al territoriu y a la trazabilidá garantizada pola denominación d’orixe.
Ente los establecimientos adheríos figuren Sidrería La Caldera, Vega Redonda, Llantares de Pelayo, La Marivuelta, La Cueva, El Polesu, El Ovetense, Balbona Picos de Europa, Asturcelta, El Molín de la Pedrera, La Sifonería de Celso, La Madreñería, Los Arcos, Neyla, Casa Zmoly, Bar Ángel, Casa Pedro y El Palco.
Con esta adhesión, Cangues d’Onís suma la so voz a la defensa d’un productu emblemáticu d’Asturies, reforzando la xunión ente hostelería, sector productor y promoción del territoriu.
