Güei cúmplese un añu del reconocimientu históricu de la Cultura Sidrera Asturiana como Padremuñu Cultural Inmaterial de la Humanidá, una fecha llamada a enfortiar l’orgullu y la responsabilidá col padremuñu del país. Coincidiendo cola efeméride, la Fundación Asturies XXI presenta públicamente’l so llibru divulgativu sobro la cultura sidrera, una obra destinada a tresmitir y fortalecer el valor cultural, social y llingüísticu de la sidre en tolos ámbitos.
Esti llibru forma parte d’un proyeutu promovíu pola Fundación Asturies XXI, que cunta col sofitu de la Conseyería de Cultura, Política Llingüística y Deporte del Principáu d’Asturies, amás de la collaboración d’un ampliu entramáu d’asociaciones y entidaes que representen distintos ámbitos del universu sidreru: la revista LA SIDRA, Cider Cities, la Cátedra de la Sidre de la Universidá d’Uviéu, el CIFP Hostelería y Turismu d Xixón, la Escuela de Sumillería de la Sidre, FASCAS, l’Ayuntamientu de Nava y la Fundación Rural Xixón. Toles instituciones implicaes compartieron conocencies, materiales y esperiencia pa garantizar una obra rigurosa, accesible y d’usu públicu.
El llibru recueye de manera visual y divulgativa los procesos, ritos, valores y elementos simbólicos de la cultura sidrera asturiana, dende la pañada de les mazanes fasta la sidre’l duernu, pasando pol escanciáu, los llagares, la comunidá y la tradición oral que vertebra esti padremuñu. La obra pon especial atención nel usu del asturianu, tanto pol so valor llingüísticu propiu como pola normalidá con que la llingua forma parte de la vida sidrera.
Como novedá destacada, la Fundación Asturies XXI facilita la descarga gratuita del llibru en formatu PDF. Pa ello, namás hai que dase d’alta nel serviciu de Whatsapp de LA SIDRA, que pon a disposición del públicu un accesu rápidu y direutu a conteníos culturales ya información sidrera.
Dende la Fundación Asturies XXI señalen que “esti ye’l meyor día pa compartir el llibru”, resaltando que la conmemoración del reconocimientu UNESCO ye “una ocasión inmeyorable pa enfortiar y reivindicar un padremuñu que representa a Asturies nel mundiu”.
Pa ser incluyíu nel whatsapp de LA SIDRA namás fai falta solicitalo bien al corréu lletrónicu: adlasidra@gmail.com o unviando un whatasapp al teléfonu 652594983 poniendo AS si se quier recibir la información n’asturianu o ES si se prefier recibir n’español
