La Federación Asturiana de Sidre Casero (FASCAS) cellebrará’l prósimu sábadu 15 payares la Primer Fiesta de la Sidre Casero, un alcuentru que va tener llugar nel Muséu de la Sidre d’Asturies, en Nava, y qu’aspira a consolidase como un referente añal pal sector de la sidre artesano y de pequeña producción
LA SIDRA.- L’actu, promovíu por FASCAS —que xunta a asociaciones d’ellaboradores caseros de’estremaos conceyos asturianos—, busca dar visibilidá y reconocencia al trabayu de los llagareros artesanos, amás de promover la cultura sidrera tradicional como parte del padremuñu cultural inmaterial asturianu.
Una xornada con dos partes diferenciaes
El programa, tal como confirmó la organización, estructúrase en dos bloques: una parte institucional y otra festiva, dambes a cellebrar nel Muséu de la Sidra y los sos alrediores.
Parte institucional
La sesión inicial, que se desendolcará nel interior del Muséu, cuntará colos discursos de les autoridaes invitaes y del presidente de FASCAS, amás de la entrega de reconocencies a persones y entidaes destacaes.
Ente elles, otorgaráse l’entítulu de “Llagareru artesanu d’honor” y otru gallardón “pola collaboración cola cultura sidrera”, en reconocencia a trayeutories que contribúin a caltener viva esta tradición.
Parte festiva
La segunda parte, de calter abiertu al públicu, va cellebrase nos esteriores del Muséu y va combinar actividaes participatives, degustaciones y esposiciones venceyaes al mundiu de la sidre y los productos asturianos.
Entre les propuestes destacaes atópense:
- Degustación de sidres caseres aportaes poles asociaciones integraes en FASCAS.
- Campeonatos de bolos y rana, recuperando los xuegos tradicionales asturianos.
- Esposición de mazanes de sidra amparaes pola DOP Sidra d’Asturies.
- Taller de mayáu, onde los asistentes van poder ver el procesu de trituración de la mazana.
- Degustación de quesos asturianos y d’otros productos elaboraos con sidra.
- Comida-espicha final, -pa la qu’hai qu’inscribise previamente- acompañada de sidra con Denominación d’Orixe Protegida.
Una cita con vocación de continuidá
Dende FASCAS sollíñase qu’esta primer edición quier sirvir como puntu d’alcuentru ente productores caseros, asociaciones llocales y aficionados, col oxetivu de consolidar una rede estable de collaboración y de promover el reconocimientu institucional de la sidre casero como espresión cultural y social.
L’eventu cunta cola collaboración del Muséu de la Sidre d’Asturies, d’asociaciones d’ellaboradores y d’entidaes llocales.
Una invitación abierta al públicu
La entrada al eventu va ser llibre, y tanto los visitantes como los vecinos del conceyu van poder participar nes degustaciones y actividaes programaes a lo llargo de la xornada. Siendo necesario iscribise previamente pa esfrutar de la espicha.
La Primer Fiesta de la Sidra Casera supón, en definitiva, un homenaxe a los llagareros artesanos y a toa una tradición que, xeneración tres xeneración, caltúvose viva como parte esencial de la identidá sidrera d’Asturies.
