La Naveta destaca nel panorama de los establecimientos que trabayen con sidre non escanciable por una razón nidia: la vinculación estrecha ente’l chigre y la sidre homónima, una marca reconocida nel Salón Internacional de les Sidres de Gala, onde La Naveta Brut, de Paca y Tola, algamó la medaya plata na categoría d’esplumosa brut.
LA SIDRA.- Nesti bar pequeñu pero carismáticu, la sidre de botellín forma parte del ADN del llocal. Ana Emilia Ordoñez, responsable del establecimientu, esplica que La Naveta “ ye una sidre bien fresca, 100% de zusmiu mazana, con segunda formientación y un carbónicu natural que-y da una chispa refrescante”. Una propuesta que, cola so versión Brut y la so variante rosada, atrái a quien busca una bébora natural, versátil y desenfadada, afayadiza pa un consumu ensin pretensiones y prestosu.
La trayeutoria del productu tamién xuega a favor. “Llevamos años con ella y la xente yá la conoz: vendemos abondo. Cuando llega daquién que nun la probó, ufiertámosla y esplicámos-y el productu. Suelprestar enforma”, comenta. L’entusiasmu de los veceros nun ye casualidá: La Naveta ye una sidre que rescampla pol so cuidu y autenticidá y que, magar ser entá poco conocía fuera del ámbitu profesional, “llama l’atención dende’l primer tragu”.
El mesmu establecimientu completa l’atractivu de la esperiencia. “Somos el chigre más pequeñu del pueblu, pero tenemos una decoración bien prestosa y una terraza grande y soleyera”, apunta. Amás d’ello, la Naveta caltién una programación cultural constante, con conciertos y música en direutu que dinamicen l’ambiente y convierten el llocal nun puntu referencia. “Más de media Asturies yá lo conoz, y agora esperamos que’l restu venga tamién a visitamos”.
Con chigres como La Naveta, qu’apuesten pol productu llocal y lu defenden con pasión, atalántase meyor por qué los nuevos productos sidreros tán ganando visibilidá, prestixu y presencia real nel día ente día de los consumidores.
