Presentación de la collecha DOP

El Conseyu Regulaor DOP Sidre d’Asturies asegura que nesta campaña podrán algamar los dos millones de quilos de mazana pa la produición de sidre.

LA SIDRA.- Dempués de la llamada “collechona” lleguen les vaques flaques. Dende finales de la primavera los productores de mazana yá avisaben de qu’esti añu la collecha vendríe con retrasu. Y asina foi. La recoyía de mazana, na so mayoría, empecipió trés o cuatro selmanes más sero de lo avezao. Los frutos inda nun s’atopaben nel so puntu de maduración afayaiza pa la ellaboración de sidre  por cuenta de que’l floriamientu foi tardíu. Sicasí, esto nun coyó despreveníu a la DOP Sidre d’Asturies qu’asegura que na prósima campaña ye probable que puedan superase los dos millones de quilos de mazana asturiano –la collecha 2015 foi de 3,7 millones– pa la produición de la sidre adscrito a dicha entidá.

Asina lo indicaron na presentación de la collecha que tuvo llugar en Villaviciosa’l 22 d’ochobre y que foi entamáu pol Conseyu Regulaor de la Sidre DOP Asturies. A esta asistió la revista LA SIDRA xunto con otros medios de comunicación. La presentación escomenzó a les diez de la mañana y visitáronse los llagares El Gobernador y Castañón, y la finca El Lledón. Nesta postrera enseñóse cómo se paña la mazana, mentes que nos dos llagares enantes mentaos desplicóse’l procesu d’ellaboración de la sidre pa producir Val de Boides, Españar DOP y EM, que son, respeutivamente, sidre natural, sidre calistrao y sidre esplumoso brut con segunda fermentaura en botella.

A les dos de la tardi nel Llagar Castañón realizóse una espicha con distintos productos asturianos, acompangada, cómo non, de la nuesa bébora patrio. Foi demientres la espicha cuando apaeció’l cantante Rodrigo Cuevas, imaxe del Conseyu Regulador, y quien interpretó pa los asistentes diversos cancios asturianos a ritmu de pandereta. Asina memos, demientres tola presentación incidióse nel conceutu de “sidreturismo” qu’escomienza a tomar pesu como forma de diferenciación nel seutor  coles mires d’ufiertar una esperiencia única y experiencial de calidá.