El prósimu 26 d’avientu, a les 12 hores, l’Atenéu Obreru de Villaviciosa va acoyer la presentación del llibru ‘Pumareres. Muyeres del Pumar’, una obra con testos de Llucía Fernández y semeyes de ‘Lujó Semeyes’ que pon el focu nel papel fundamental de les muyeres venceyaes al cultivu de la mazana y a la cultura sidrera asturiana.
L’actu va cuntar cola presencia de los autores, que van esplicar el procesu de trabayu y investigación del llibru, basáu en testimonios direutos y entrevistes a muyeres pumareres. Al rematar la presentación, va clelebrase una sesión de firma d’exemplares, abierta a toles persones asistentes.
Amás, va entregase un exemplar del llibru a caúna de les muyeres entrevistaes, como reconocimientu al so papel y a la so contribución directa a la obra. Un xestu que refuerza’l calter participativu del proyectu, pensáu dende’l respetu y la memoria compartida.
Como parte del actu, regalarase tamién a caún de los asistentes el llibru ¿Qué ye la Cultura Asturiana de la Sidre?, una espublización divulgativa de la Fundación Astureis XXI, con sofitu de la Conseyería de Cultura, Política Llingüística y Deporte, qu’aida a contestualizar la importancia social, cultural y patrimonial de la sidre n’Asturies.
La presentación de ‘Pumareres. Muyeres del Pumar’ conviértese asina nuna oportunidá pa visibilizar un trabayu de fondu sobro la memoria rural, la transmisión de saberes y el protagonismu de les muyeres nel ciclu de la mazana y la sidre, nun espaciu de referencia cultural como l’Atenéu Obreru de Villaviciosa.
Un actu abiertu al públicu, que combina divulgación, reconocimientu y cultura, y que convida a siguir mirando a la sidre dende una perspectiva humana y coleutiva.
El llibru cunta col sofitu de la FMCDYUP del Ayuntamientu Xixón y de la DOP Sidre d’Asturies.
