A pocos metros de la sablera de San Llorenzo atopamos una de les sidreríes xixoneses más fieles a la tradición sidrera y culinaria, lo que nun quita pa qu’incorporen productos novedosos a la so carta, como ye’l casu de la sidre de xelu.
Na Sidrería Asturias lleven más de cuatro años ufiertando la Sidre de Xelu Cortina, del llagar Cortina, convirtiéndose asina nuna de les primeres sidreríes onde se pudo prebar esti productu singular. El venceyu col llagar vien de llueñe: acumulen yá 43 años trabayando namás cola sidre Cortina, una escoyeta basada —esplica Juan Manuel Lamela— na calidá y na regularidá de les sos ellaboraciones. Por eso, cuando tuvo la ocasión de prebar la sidre de xelu depués d’algamar el so primer reconocimientu nel SISGA, nun dudó n’incorporala a la carta.
La manera de presentala al públicu tamién forma parte d’esa apuesta. “Nós ufiertámosla la primer vegada”, esplica Lamela, encargáu del llocal, y la respuesta suel ser inmediata: “Nel momentu que la preben, repiten”. Destaca, amás, que nun se trata d’una bébora enforma dulzapaya, sinon que caltién un equilibriu bien midíu ente’l dulzor y l’acidez, “perfeutu pa que nun repune y se dexe beber bien”, lo que facilita que’l cliente la torne a pidir.
SIDRERÍA ASTURIAS. Aquilino Hurlé 36 – Xixón. T. 985 37 45 16
