Naguración d’esposición de semeyes LA SIDRA y entrega premios

Na xornada d’ayeri tuvo llugar na Sidrería La Galana la entrega premios del XII Concursu Semeyes LA SIDRA y la naguración de la esposición coles 20 meyores semeyes participantes.

LA SIDRA.- La Sidrería La Galana foi como d’avezu l’escenariu nel que se desendolcó la entrega premios d’esta decimo segunda edición del Concursu Semeyes LA SIDRA, qu’esti añu cuntó cola participación de más de 300 obres, de cerca de 100 autores provinientes de 72 países.

L’actu, que contó con bien de públicu, entamó cola intervención del presidente de la Fundación Asturies XXI, Marcos Abel Fernández, entamó agradeciendo al Llagar JR el so padrociniu, a la Sidrería La Galana, al grupu fotográicu Asemeyando, y la CEF pola so collaboración, y siguió desplicando los oxetivos d’esta convocatoria, cómo se pretende reforciar la cultura asturiana de la sidre faciéndola desendolcase nel arte fotográficu y ufiertando otra manera d’interpretar y vivir esta cultura nuesa.

Asina mesmo, na intervención criticó’l llabor del “Principado” na xestión de la candidatura de la cultura sidrera asturiana énte la Unesco, que se retrasa otru añu –y van 11-, “mentes que candidatures anunciaes al empar que l’asturiana yá algamaron hai años la reconocencia de la Unesco, el “Principado” entá nun presentó la candidatura ensiquiera en Madrid”, acotando la incapacidá y el desinterés del “Principado” y afirmando que “La Conseyera de Desendolcu Rural Mª Jesús Álvarez, y el que fuere Direutor xeneral de dicha conseyería, Jesús Casas, nun cumplieron colo prometío al nun presentar la candidatura esti añu”, destacando tamién la trescendencia económica que supondríe esta reconocencia de la Unesco, pa la marca “Asturies” y les sos repercusiones nel seutor turísticu y de la esportación.

N’otru sen, felicitó a tolos participantes pola calidá de les obres presentaes, recordó qu’esti añu hai un récord de participación internacional, y apurrío-y la pallabra a Jesús Martínez Salvador, Conceyal de Turismu y Festexos del Ayuntamientu Xixón.

Na so intervención Jesús Martínez recalcó’l compromisu del Ayuntamientu Xixón cola sidre y la cultura sidrera asturiana, corroboró la denuncia fecha por Marcos Abel Fernández, asumiendo la importancia d’avanzar nos trámites énte la Unesco, y agradeció l’esfuerciu fechu polos convocantes y collaboraores por faer que la cultura sidrera asturiana vaiga a más.

Darréu entamó la naguración de la esposición y la entrega premios. El primer premiu foi pa la semeya “La sidra y la manzana” d’Adolfo Loyola procedente d’Arxentina. El primer accésit recayó n’Arturo Rodríguez Ortiz, d’España, que participó con “El nadador”. El segundu accésit foi pa “Pomum Tributum 1”, tamién d’España y rializada por Antonio Farto Casado. Finalmente, el premiu especial qu’otorga’l llagar JR foi pal asturianu Óscar Chamorro Flórez y la so istantánia “Bodegón”.

[ngg src=”galleries” ids=”37″ display=”basic_slideshow” interval=”1993″]

Pa finar entregóse a los asistentes un exemplar de la etiqueta comemorativa del actu, cola semeya ganaora del concursu.