La iniciativa europea Cider Cities va participar esti 8 de mayu nel I Foru Canariu de la Sidre, que se cellebra na Casa del Vinu de Tenerife dientru del proyeutu ‘Raíces Atlánticas’. La rede va dar a conocer el so modelu de cooperación ente territorios venceyaos a la cultura de la sidre y la mazana.
LA SIDRA.- La presentación de Cider Cities ta prevista pa les 17:15 hores na sala multifuncional del recintu baxo’l títulu “Presentación de la Iniciativa CIDERCITIES: Red Europea de Ciudades de la Sidra y la Manzana (RECS)”. L’actu forma parte d’una xornada empobinada a fortalecer la cultura sidrera de Canaries y a favorecer l’aniciu d’espacios de cooperación ente productores, instituciones y territorios europeos venceyaos a la sidre.
El programa del I Foru Canariu de la Sidre va entamar cola recepción de participantes y la naguración oficial, na que van intervenir responsables del Gobiernu de Canaries, del Cabildru de Tenerife y del Institutu Canariu de Calidá Agroalimentaria. Tres la intervención de Cider Cities va cellebrase la constitución del I Foru Canariu de la Sidre, concebíu como espaciu estable de coordinación y trabayu pal sector sidreru canariu.
La participación de Cider Cities supón un nuevu pasu na proyección internacional de los territorios productores de sidre del Arcu Atlánticu y d’otros espacios europeos, promoviendo l’intercambiu d’esperiencies, la valorización del patrimoniu sidreru y la cooperación cultural y turística alredior de la sidre y la mazana.
La xornada va piesllase con una tastia guiada de sidres canaries y un cóctel de clausura. El programa va continuar el día 9 col I Alcuentru de Productores de Sidre de la Macaronesia, qu’inclúi talleres de maridaxe, mixoloxía sidrera, showcookings y actividaes de promoción gastronómica.
Más información sobro la iniciativa europea puede atopase en Cider Cities
