La Fundación Asturies XXI inauguró en Bimenes «La sidre na emigración asturiana», una esposición que recupera la memoria de quienes llevaron la cultura sidrera al otru llau del Atlánticu y convida a reflexonar sobre les migraciones d’ayeri y de güei
LA SIDRA.- Una botella de sidre nun retratu de 1870 pue contar muncho más de lo que paez. Fala del país que quedó atrás, de los vezos que se llevaron na maleta y de la necesidá de siguir sintiéndose parte d’una comunidá a miles de quilómetros de casa. Esa ye la historia que propón descubrir «La Sidre na emigración Asturiana», inaugurada’l vienres 30 d’ochobre na Casa Cultura de Santuyano, en Bimenes.
Promovida pola Fundación Asturies XXI y comisariada por Llucía Fernández Marqués, la esposición axunta venti pieces que documenten la presencia de la sidre nes comunidaes asturianes d’América a entamos del sieglu XX. Nel actu intervinieron l’alcalde de Bimenes, Aitor García Corte; la directora xeneral d’Emigración y Polítiques de Retornu, Olaya Gómez Romano; el presidente de la Fundación, Marcos Abel Fernández Marqués, y la propia comisaria.
La inauguración tuvo un filu compartíu: l’alcordanza y el respetu a les persones que tuvieron que dexar Asturies a la gueta d’una vida meyor. Detrás de les semeyes hai celebraciones, negocios y alcuentros, pero tamién separaciones familiares y l’esfuerzu por conservar la identidá y los llazos col país d’orixe.
Aitor García Corte destacó precisamente esa capacidá de la emigración asturiana pa llevar consigo la so cultura y, con ella, la sidre. Una pertenencia que se reconstrúi nos llugares d’acoyida al traviés de les relaciones personales y del asociacionismu. «Ehí onde s’alcuentren dos asturianos, ñaz un centru asturianu», comentó l’alcalde, resumiendo con humor esa voluntá de siguir xuntos incluso lloñe de casa.
Marcos Abel Fernández Marqués reclamó un reconocimientu pa tolos asturianos emigraos y recordó que la marcha a América nun foi la cabera gran salida de población del país. Na so intervención repasó l’exiliu tres la represión de la revolución de 1934, la derrota del Conseyu Soberanu en 1937 y la emigración de los años sesenta, motivada principalmente pola necesidá económica.
El presidente de la Fundación llevó tamién la reflexón al presente. Alvirtió de que la emigración sigue marcando la vida asturiana y afirmó que’l 50 % de la población asturiana d’ente 18 y 35 años vive fuera’l país.
Olaya Gómez Romano convidó a mirar esa memoria dende la realidá de les persones que güei lleguen a Asturies dende otros países pa buscar una vida meyor. La so intervención trazó un paralelismu ente aquelles esperiencies y les migraciones actuales, insistiendo na necesidá de recordar que, enantes de ser tierra d’acoyida, nós ya yéremos emigrantes.
El percorríu documental de la muestra abarca dende 1870 hasta 1947. Ente les imáxenes destaquen dos daguerrotipos tomaos en Méxicu y Cuba, en 1870 y 1885, respectivamente, tanto pola so antigüedá como pola composición: la presencia de la sidre dientro del retratu convida a reparar nel valor que se-y concedía y nel llugar qu’ocupaba na representación de la propia identidá.
Pa finar les intervenciones, Llucía Fernández Marqués convidó a les persones asistentes a percorrer la esposición con ella. La visita comentada permitió detenerse nos detalles de cada pieza y conocer les histories que les imáxenes ayuden a reconstruyir.
Al actu acudieron representantes de delles asociaciones ya instituciones, ente elles la Cátedra de la Sidra, l’Academia de la Llingua Asturiana y el Centru Asturianu d’Uviéu. Ufrieronse sidres chilenes, arxentines y de marques asturianes con presencia nesos países, como una manera de compartir los vínculos que documenten les semeyes.
La esposición yá cuenta con solicitudes de conceyos y centros sociales de distintos puntos d’Asturies pa siguir el so percorríu. La memoria que conserva vuelve asina a ponese en camín, esta vegada pa contar equí cómo se caltuvo viva la cultura sidrera allá.
