LA SIDRA d’Ochobre’25 (Nb. 258)

Ya ta na cai la revista LA SIDRA correspuendente al mes d’ochobre de 2025 (númberu 258), una edición que perafita’l so compromisu cola cultura, la gastronomía y la identidá asturiana al traviés del universu la sidre.

El presente númberu ta domináu pola cobertura del XV Salón Internacional de les Sidres de Gala (SISGA’25), cellebráu en Xixón, onde más de sesenta llagares de venti países presentaron doscientes trenta y seyes variedaes sidreres. La espublización recueye con detalle les xornaes del eventu: la tastia nagural, les tasties guíaes, la asamblea de Cider Cities, el Brunch de Gala y la Entrega Premios. Nel palmarés destacaron los llagares asturianos, que llograron quince gallardones, cuatro d’ellos Premium, confirmando’l lideralgu d’Asturies nel panorama sidreru mundial.

Pero la revista va acullá del SISGA. El so entamu repasa la intensa xera serondiega de concursos y festivales —como’l Festival de la Mazana de Villaviciosa o Xixón de Sidre 2025— y reflexona sobro la falta de planificación na producción de mazana, un esmolecimientu recurrente nel sector.

La seición “Actualidá” informa sobro la preparación de la DOP Sidra d’Asturies pa la temporada de pañar y mayar, ente que nes páxines dedicaes a los concursos de sidre casero destácase la vitalidá popular d’esta tradición en conceyos como Salas, Ayer, Siero, Gozón o Ribeseya.

Nel ámbitu social, el reportaxe “Muyeres qu’echen sidre” da voz a muyeres como Deisy Argüeyo, símbolu d’una nueva xeneración que combina conocencia téunico y raigañu cultural. Pela so parte, la seición “Clú de la Sidra” cellebra la 41ª Clas d’Echar Sidre, y artículos como “Sidre nel ximnasiu” o “Chigres, del mar a la sidre” amuesen la espansión contemporánea de la bébora a nuevos espacios y usos.

Na parte final, “Asturies Gastronómica” rinde homenaxe a la cocina asturiana con menciones al Xamón Ibéricu Grande Covián 2025, un recuerdu al mayestru destilador Emilio Serrano, y un repasu a l’Academia Gastronómica de los Caminos de Santiago, que sigue espardiendo la riqueza culinaria del norte peninsular.

Con más de cien páxines, abondes semeyes y testos bilingües (asturianu y castellanu), LA SIDRA 258 combina divulgación, crónica y sensibilidá . La publicación, ellaborada ensin subvenciones públiques, caltién el so espíritu independiente y el so papel como referente cultural y gastronómicu d’Asturies.

Pa recibir de forma gratuito’l PDF de la revista, namás hai que dase d’alta nel whatsapp de LA SIDRA,  652 594 983, poniendo ES si se quier recibir información n’español o AS si n’asturianu.