La Fundación Asturies XXI espubliza en xaponés el llibru divulgativu ¿Qué ye la Cultura Asturiana de la Sidra?, una nueva ferramienta pa presentar el nuesu patrimoniu nel país asiáticu a les puertes del SISGAJapan, que va cellebrase’l 30 d’agostu na Akihabara UDX Gallery de Tokio
DESCARGA PDF EN XAPONÉS / DESCARGA PDF N’ASTURIANU
LA SIDRA.– La Cultura Asturiana de la Sidre da un pasu nuevu na so proyeición internacional. La Fundación Asturies XXI acaba d’espublizar la versión xaponesa del llibru ¿Qué ye la Cultura Asturiana de la Sidra?, una obra divulgativa concebida p’averar a públicos de distintes procedencies la historia, los saberes, los espacios y los rituales sociales construyíos alredor de la bebida más representativa d’Asturies.
La edición xaponesa caltién la estructura, les semeyes y la maquetación de la obra orixinal, sustituyendo los testos n’asturianu por una traducción preparada pal públicu nipón. La iniciativa amplía’l percorríu internacional d’un llibru que la Fundación Asturies XXI presentó coincidiendo col primer aniversariu de la reconocencia de la Cultura Asturiana de la Sidra pola UNESCO.
La publicación parte d’una idea fundamental: n’Asturies, la sidre ye muncho más qu’una bebida. Ye un símbolu d’identidá, comunidá ya historia viva, venceyáu al paisaxe, la economía, la llingua y les rellaciones sociales. L’oxetivu del llibru ye dar a conocer los valores, saberes y procesos que la arrodien, destacando’l so papel como bien cultural y social.
Les sos páxines percorren los oríxenes históricos de la sidre, les pumarades, la pañada de la mazana, el prensáu, los llagares, les espiches y los chigres. Tamién espliquen la función de la botella y el vasu, l’arte d’echar sidre, la ellaboración de sidre casero, les fiestes, la llingua asturiana, los saberes femeninos y la sostenibilidá del modelu agrariu sidreru. La obra presenta, poro, una visión global d’un patrimoniu que combina tradición ya innovación y que se tresmite de xeneración en xeneración.
La torna al xaponés llega, amás, nun momentu especialmente significativu. El próximu 30 d’agostu, Tokio va acoyer una nueva edición del SISGAJapan, l’alcuentru xaponés venceyáu al Salón Internacional de les Sidres de Gala. La cita va desenvolvese na Akihabara UDX Gallery y va axuntar a productores procedentes de distintes zones de Xapón y d’otros países, xunto con profesionales y públicu aficionáu a la sidre.
El programa va incluyir degustaciones, harmonizaciones gastronómiques, talleres, conferencies, espacios profesionales y entrega de premios. Ente les actividaes previstes ta la participación de la delegación asturiana de la Fundación Asturies XXI, que va impartir un taller d’echar sidre acompañáu d’una explicación sobre la Cultura Asturiana de la Sidre. La versión xaponesa del llibru ofrez agora un material divulgativu capaz de completar esta esperiencia y facilitar que’l públicu conozca’l significáu cultural de lo que ve y prueba.
Una rellación construyida pasu ente pasu
La conexón ente Asturies y Xapón alredor de la sidre nun nació agora. En 2023, una delegación de LA SIDRA y la Fundación Asturies XXI participó na Tokyo Cider Collection, onde protagonizó conferencies dedicaes a la sidre asturiana, la so cultura y el SISGA. Aquella presentación del SISGA en Xapón abrió una vía estable de collaboración con productores, establecimientos y profesionales xaponeses.
La rellación consolidóse en 2025 cola primer edición del SISGAJapan, que supunxo la primer celebración del Salón Internacional de les Sidres de Gala fuera d’Asturies nos sos quince años de trayeutoria. La respuesta de miles de persones confirmó l’interés del públicu xaponés pola diversidá internacional de la sidre y polos elementos culturales qu’acompañen la tradición asturiana.
Nesti procesu foi especialmente importante la collaboración con productores y prescriptores xaponeses como Tatsuro Fuji, responsable de Kanda Eclipse First Sidreria y conocíu pola so trayeutoria como embaxador de la sidre asturiana en Xapón. Estos contactos permitieron superar una promoción basada únicamente nel productu y avanzar hacia un intercambiu de conocimientos, formes d’ellaboración, rituales y maneres d’entender la sidre.
Traducir pa compartir una cultura
La versión xaponesa de ¿Qué ye la Cultura Asturiana de la Sidra? nun ye namás una traducción llingüística. Ye una ferramienta de diplomacia cultural que permite explicar por qué una pumarada forma parte del paisaxe asturianu, qué representa una espicha, por qué’l culín se bebe darréu o qué valores sociales s’espresen al compartir una botella y un vasu.
La reconocencia de la UNESCO supón un motivu d’arguyu, pero tamién un compromisu col caltenimientu y la tresmisión d’esti patrimoniu. Llevar el llibru al xaponés significa asumir esa responsabilidá, creando materiales capaces d’averar la Cultura Asturiana de la Sidre a una sociedá que ta construyendo una escena sidrera propia y que presenta un interés creciente polos productos venceyaos al territoriu, la calidá y la tradición.
Cola nueva edición y cola próxima celebración del SISGAJapan, Asturies va presentase en Tokio non solo al traviés de les sos botelles, sinón tamién per aciu de la so historia, la so llingua, los sos paisaxes y la so manera particular de compartir la sidre.
