El Conceyu Llanes acoyerá esti mes de xunu la segunda edición de les Xornaes de Cultura Sidrera, una iniciativa que combina divulgación, investigación, tradición y participación popular alredIor d’Ún de los elementos más representativos del padremuñu cultural asturianu.
LA SIDRA.- El programa entamará’l vienres 12 de xunu cola inauguración de la esposición de semeyes “Cultura Sidrera Asturiana”, obra de Saúl Martínez Mendaro, director del programa del Muséu del Pueblu d’Asturies. La muestra podrá visitase fasta’l 30 de xunu na Casa de Cultura de Nueva.
Les xornaes van siguir el vienres 19 de xunu con una tarde dedicada a les charres téuniques. Daniel Exner, de Finca Gallinal, falará sobre “El retu de producir mazana de calidá de manera rentable”, ente que Guillermo García Martínez va abordar la “Producción de mazana de forma tradicional”. Les dos intervenciones van cellebrase na Casa de Cultura de Nueva ente les 19.00 y les 21.00 hores.
Una selmana dempués, el vienres 26 de xunu, tendrá llugar una nueva conferencia baxo l’entítulu “La sidre na cultura asturiana: una cosmovisión dende la Revolución Industrial fasta los nuesos díis”, impartida por Lucio Carril Sánchez. La cita tendrá llugar tamién na Casa de Cultura de Nueva, ente les 19.30 y les 21.00 hores.
Les xornaes inclúin amás el II Concursu de Sidre Caseru del Oriente César Ruiz Sánchez ‘El Cuchareru’, una iniciativa dedicada a promover y reconocer la ellaboración tradicional de sidre casero na contorna. La recoyía de les muestres, 18 botelles de sidre natural ensin etiquetar y ensin marcar, va realizase los díis 17 y 18 de xunu nel establecimientu El Cuchareru.
Les rondes previes del concursu celebraránse los díes 22 y 24 de xunu, mentes que la semifinal ta prevista pal 25 de xunu, tamién n’El Cuchareru.
La programación va rematar el domingu 28 de xunu na Plaza de la Blanca de Nueva cola final del concursu y una preba popular que dará entamu a les 12.30 hores. La xornada va tar animada pola Bandina Los Muiles y tonada.
Les II Xornaes de Cultura Sidrera tán entamaes pol Conceyu de Llanes y cuenten cola collaboración de distintes entidaes y asociaciones venceyaes a la cultura sidrera y al territoriu. La iniciativa busca siguir afondando nel conocimientu y la difusión d’una tradición que forma parte esencial de la identidá cultural asturiana.
