La Cultura Sidrera Asturiana va tener protagonismu propiu na ufierta de Cursos de Branu 2026 de la Universidá d’Uviéu. Baxo l’entítulu “La Cultura Sidrera Asturiana. Historia, Ciencia y Patrimonio”, la institución académica va desendolcar ente’l 29 de xunu y el 3 de xunetu una actividá formativa que busca averar al alumnáu y al públicu xeneral a esti padremuñu dende una perspeutiva multidisciplinar.
LA SIDRA.- El cursu va cellebrase na Casa de La Buelga, en Ciañu (Llangréu), va tener una duración de 25,5 hores y va reconocer un créditu ECTS. La matrícula ye gratuita y les places tán llindaes a 20 participantes. La dirección académica correspuende a Luis Benito García Álvarez, direutor de la Cátedra de la Sidra de la Universidá d’Uviéu.
Según la información facilitada pola Universidá d’Uviéu, l’oxetivu principal ye realizar un averamientu integral a la cultura sidrera, poniendo en común aportaciones procedentes de les humanidaes, les ciencies sociales y les ciencies esperimentales, amás de formular propuestes d’educación patrimonial. El programa inclúi tamién actividaes venceyaes al sector ellaborador y a ámbitos estremaos pero rellacionaos, como la gastronomía asturiana.
La convocatoria llega nun momentu especialmente relevante pa la proyeición internacional de la sidre asturiana. La Cultura Sidrera Asturiana foi inscrita na Llista Representativa del Patrimoniu Cultural Inmaterial de la Humanidá de la UNESCO n’avientu de 2024, un reconocimientu que punxo en valor non solo la ellaboración de la ébora, sinón tamién el conxuntu de conocencies, práutiques, paisaxes y formes de sociabilidá que se desendolquen alredior d’ella.
La propuesta académica de la Universidá d’Uviéu busca precisamente afondar nesa visión amplia de la cultura sidrera, analizando la so dimensión histórica, científica, social y patrimonial. D’esta miente, el cursu preséntase como una oportunidá pa conocer meyor ún de los elementos identitarios más representativos d’Asturies y reflexonar sobro los retos de la so conservación y tresmisión a les xeneraciones futures.
