La UNED Asturies entamará del 15 al 17 de xunetu en Xixón un cursu de branu dedicáu a la Cultura Sidrera Asturiana ‘La sidre n’Asturies: de particulasimu alimentariu a Padremuñu Cultural Inmaterial de la Humanidá’, un padremuñu que dende 2024 forma parte de la Llista Representativa del Padremuñu Cultural Inmaterial de la Humanidá de la UNESCO. La iniciativa va dexar afondar nes rellaciones ente la sidre, el territoriu, el padremuñu y la sostenibilidá, al traviés d’un programa que xunta a investigadores, docentes y profesionales del sector.
LA SIDRA.- Les sesiones van tratar cuestiones venceyaes a les pumaraes como paisaxes culturales, la gobernanza de la Cultura Sidrera Asturiana tres el reconocimientu internacional, les variedaes tradicionales de mazana, la biodiversidá de les pumaraes y la importancia de la Denominación d’Orixe Protexida Sidre d’Asturies. El programa inclúi amás una tastia comentada de sidres acoyíes a la DOP y un taller d’analís sensorial.
La ellaboración de la sidre, dende los ámbitos domésticos fasta los llagares agroindustriales, va ocupar tamién una parte destacada del cursu, que pretende ufiertar una visión global sobro los procesos de producción, distribución y consumu que conformen la cultura sidrera asturiana. La formación va poder siguise de manera presencial o en llinia y ta dirixida tanto a persones interesaes na materia como a estudiantes y profesionales de distintos ámbitos académicos.
Entamáu pol Centru Asociáu de la UNED n’Asturies, el cursu busca contribuyir a la conocencia y valoración d’un padremuñu que tresciende’l productu alimentariu y que forma parte esencial de la identidá cultural d’Asturies y de los sos paisaxes más carauterísticos.
