El númberu de xineru de la revista La Sidra tien como artículu principal una entrevista a Rodrigo Cuevas, ún de los creadores más influyentes del panorama cultural asturianu actual. Cantante, performer y axitador cultural, Cuevas defende la sidre non solo como bébora, sinón como parte esencial del ociu, de la identidá y de la vida comunitaria n’Asturies
LA SIDRA.- Pa Rodrigo Cuevas, la sidre ocupa un llugar central nel so día ente día, especialmente venceyada a los espacios de socialización y al tiempu compartíu. Beber sidre ye, pa elli, un actu colleutivu que crea vínculos y comunidá, una práutica viva que sigue teniendo sentíu nel presente. Pero la so defensa va muncho más allá del simple consumu: Cuevas insiste na necesidá de conocer la sidre a fondu, d’entender cómo se fai, de pasar tiempu nos llagares y de recuperar una cultura que nun se pue reducir a un xestu simbólicu.
Esa visión entronca cola so manera d’entender la cultura: una reinterpretación contemporánea de la tradición oral, lo rural y lo popular, dende una mirada llibertaria y fondamente identitaria. La sidre, como productu y como cultura, forma parte d’esa gran narración colleutiva asturiana que, pa siguir viva, necesita participación, conocimientu y tresmisión.
Amás, Cuevas señala la importancia de los chigres como espacios fundamentales pa la vida social. Llugares onde se mesturen xeneraciones, procedencies y sensibilidaes distintes, y onde la cultura puede apaecer d’una manera natural, informal y accesible. Esa idega concrétase en proyeutos como La Maléfica, el chigre vinculáu a la recuperación del teatru de La Benéfica, en Piloña, nel que ta implicáu activamente. Un espaciu pensáu non solo como llugar d’ociu, sinón tamién como ferramienta pa caltener iniciativas culturales y dinamizar la vida comunitaria.
La so visión estiéndese tamién al campu y al paisaxe. Como antigua imaxe de la DOP Sidre d’Asturies, Cuevas defende les pumares frente al avance de los ocalitos, reivindicando un modelu agrariu más respetuosu col ecosistema, más integráu na cultura asturiana y con mayor valor social y simbólicu. Pa elli, la sidre ye tamién una oportunidá pa reactivar territorios rurales y enfortiar la rellación ente cultura, paisaxe y economía llocal.
Esti artículu forma parte del conteníu central del postrer númberu de LA SIDRA, una invitación clara a mirar la sidre non solo como un productu que se bebe, sinón como un saber que se comparte y se defende.
