El Muséu de la Sidre d’Asturies, en Nava, volvió ser l’escenariu de la entrega de los Premios de Echanores d’Asturies 2025, una cita que cada añu reconoz el trabayu de los profesionales que, culín a culín, dan forma a una de les señes más visibles de la cultura sidrera.
LA SIDRA.- Nesta ocasión, el premiu al meyor echaor del añu foi pa Salvador Ondó, de la sidrería Tierra Astur, que se fixo col primer puestu de la clasificación final del campeonatu.
L’actu, entamáu pol Conseyu Regulador de la DOP Sidra d’Asturies xunto cola Asociación d’Echaores de Sidra d’Asturies (AESA), sirvió pa reconocer a los diez primeros clasificaos de la temporada, que recibieron el so diploma acreitativu, amás d’un premiu económicu pa los trés primeros puestos.
Tres Ondó, el podiu completáronlu Wilkin Aquiles y Jorge Vargas, dambos de La Montera Picona. Nel restu de la clasificación apaecen nomes bien conocíos del circuitu d’echaores, como Amauris La Pauta, Melissa Bellón, Antonio Sorca, Pelayo Rodríguez, Jonathan Trabanco, Isabella Padrón y Pablo Suárez, amosando’l bon nivel d’una cantera que cada añu suma nuevos talentos.
Amás de la clasificación xeneral, l’actu tamién premió la categoría Sub-25, pensada pa reconocer a los echaores más mozos. Nesti casu, el primer puestu foi pa Amauris La Pauta, siguíu por Isabella Padrón y Melissa Bellón, confirmando la renovación xeneracional d’un oficiu que combina téunica, práutica y sensibilidá pola sidre.
Una de les novedaes d’esta edición foi’l premiu al meyor equipu d’echaores de sidrería, que busca destacar el trabayu coleutivu nel serviciu de sidre. El primer puestu foi pa La Montera Picona de Ramón, en Xixón, siguida por Tierra Astur (Uviéu), El Portal (Villaviciosa) y Fuente Villoria (Llugones).
Acullá de la competición, estos premios vuelven recordar que l’arte d’echar sidre nun ye namás una cuestión estética. L’ehcar sidre ye parte esencial de la esperiencia sidrera: determina la oxixenación, la formación del “culín” y la manera na que la sidre espresa los sos arumes y saborgos.
Reconocer a los meyores echaores ye, en definitiva, una forma de dar valor a un oficiu que forma parte del día ente día de los chigres y que sigue siendo una de les imaxes más reconocibles de la cultura sidrera asturiana.
