Clúster Asturies Turismu Caltenible na Feria de Biocultura en Barcelona

Nel espositor promociónase’l proyeutu Alienda Asturies Countrylife Festival, con esperiencies d’agroturismu y ecogastronomía

LA SIDRA.- El Clúster Asturies Turismu Caltenible va tar presente na Feria de Biocultura que se cellebra en Barcelona del 5 al 8 de mayu pa dar a conocer los sos proyeutos énte un públicu interesáu por un consumu ecolóxicu y responsable.

Dichu clúster tien como oxetivu promover el desendolcu y l’anovación nel seutor turísticu asturianu cola fin de convertilu nun referente de calidá tocantenes a  destín ecolóxicu y responsable. Coles mesmes, busca ameyorar la competitividá de seutores productivos fundamentales pal caltenimientu del territoriu rural asturianu.

Ún de los sos primeros proyeutos ye la rialización del “Primer Festival de la Ruralidá, de la Caltenibilidá y de la bona vida del país” de magar el 5 xunu –Díi Mundial del Mediu Ambiente–. El so nome: Alienda Asturies Countrylife Festival. Llevaráse a cabu n’estremaos destinos y va cuntar con una diversidá d’esperiencies d’agroturismu, d’ecoturismu y d’ecogastronomía que permitirá, sigún indiquen los sos organizadores, “dar conocer y alendar Asturies dende la mariña al monte, dende Colombres a Redes, dende Somiedu a Borines pasando pola Contorna de la Sidre; o dende Xixón y Cabu Peñes a Fontes del Narcea”. De xacíu la sidre va tar presente, siquier un llagar asturianu qu’ellabora sidre ecolóxico va participar nel festival demostrando que la sidre ye la bébora “bio” y ecolóxica por escelencia.