La Casa de Cultura de Santuyano va acoyer el 30 d’ochobre de 2026, a les 19:00 hores, la presentación d’esta esposición sobre la cultura sidrera nes comunidaes emigrantes.
Entamada pola Fundación Asturies XXI y comisariada por Llucía Fernández Marqués, la muestra recupera semeyes, cartelos y etiquetes que documenten la presencia de la sidre nes celebraciones, los alcuentros familiares y la vida comercial de la emigración asturiana.
Los veinte paneles de gran formatu inclúin testimonios como’l retratu de dos emigrantes en Cuba en 1885 o l’embarque de sidre El Gaitero na ría de Villaviciosa hacia 1920. Son imáxenes que permiten siguir el camín de les botelles y de les persones que llevaron los sos vezos al otru llau del Atlánticu.
La esposición recueye tamién la importancia de la demanda emigrante pa la espansión de la sidre d’espolleta y la modernización de los llagares. El comerciu y la publicidá ayuden a esplicar cómo la sidre algamó presencia en cafés, hoteles y establecimientos americanos.
El proyeutu complétase con un llibru de 48 páxines y una esposición virtual, disponibles na web de la Fundación Asturies XXI. La iniciativa cuenta col sofitu de la Conseyería de Presidencia y sigue abierta a incorporar documentación familiar, empresarial y asociativa.
La cita del vienres en Santuyano va averar al públicu de Bimenes esti percorríu pola memoria sidrera de la emigración asturiana.
Semeya: embarque de sidre El Gaitero, Villaviciosa, hacia 1920. A. del Fresno. Colección Histórica de Valle, Ballina y Fernández, S.A. / Fundación Asturies XXI.
