La Fundación Asturies XXI convoca una nueva edición del Concursu Internacional de Semeyes LA SIDRA, un certame abiertu a fotógrafos profesionales y aficionaos que quieran retratar la cultura sidrera y la so dimensión social, cultural y gastronómica.
LA SIDRA.- El concursu, de participación gratuita, tien como temática la sidre, la mazana y tolo que forma parte de la so cultura, dende los llagares y el procesu d’ellaboración fasta’l so consumu o les escenes de vida venceyaes a esta tradición. Ca participante podrá presentar fasta cinco semeyes, realizaes con cámara o móvil y unviaes en formatu dixital al traviés de la plataforma habilitada pola organización.
El plazu d’almisión d’obres tará abiertu del 1 d’abril al 15 setiembre de 2026, y el xuráu escoyerá la imaxe ganadora, dos accésits y una mención especial, amás d’una esbilla de semeyes finalistes que formarán parte d’una esposición pública.
El primer premiu ta dotáu con 700 euros y medaya d’oru de la Confederación Española de Fotografía (CEF), completándose’l palmarés con dos accésits y la mención especial “Sidra JR”.
Sofitu institucional y collaboración del sector sidreru
El concursu ta entamáu pola Fundación Asturies XXI cola collaboración de l’Asociación Fotográfica Asemeyando, encargada del sofitu téunicu y de la xestión del certame. El llagar Sidra JR participa como patrocinador principal del concursu, reforzando la vinculación ente’l sector productor y les iniciatives culturales venceyaes a la sidra.
Asina mesmo cunta col sofitu de la Conseyería de Cultura, Política Llingüística y Deporte del Principáu d’Asturies, que respalda esti tipu d’iniciatives dedicaes a dar puxu al padremuñu cultural venceyáu a la sidra
La entrega premios y la naguración de la esposición de les semeyes finalistes va cellebrase na Sidrería La Galana de Xixón, un espaciu que dende hai años acueye esti actu y que se convirtió nun referente pa la difusión de la cultura sidrera y fotográfica.
Les veinte semeyes finalistes van formar parte d’una esposición que podrá visitase nesti establecimientu y que depués se moverá a otros espacios culturales, contribuyendo a dar visibilidá a la cultura sidrera al traviés de la imaxe.
Un concursu consolidáu
Esti certame, únicu pola so temática nel Estáu y con vocación internacional, nació cola idea de visibilizar la cultura sidrera al traviés de la fotografía, y col tiempu convirtióse nuna referencia pa fotógrafos interesaos nesta tradición cultural.
